نتنیاهو وایي د ایران او نیابتي ډلو پر وړاندې یې ګوزار پای ته نهدی رسېدلی
د اسراییل لومړي وزیر بنیامین نتنیاهو د ګوش عتصیون په سیمه کې د دغه هېواد د احتیاطي جنګي افسرانو سره د لیدنې پرمهال ویلي، چې له ایران او نیابتي ډلو سره یې مقابله لاهم دوام لري او په راتلونکو لسیزو کې د اسراییل دریځ د دغه هېواد وړتیاوو او ځواک پورې تړاو لري.
نتنیاهو ویلي: «موږ اوسمهال د ایران او نیابتي ډلو پر وړاندې یې ولاړ یو. موږ هغوی ته ضربه ورکړې ده. دغه مسله لا پای ته نهده رسېدلې». هغه زیاته کړه، چې په راتلونکو لسیزو کې د اسراییل دریځ د دغه هېواد وړتیاوو او ځواک پورې تړاو لري او له همدې امله د اسراییل حکومت خپل ظرفیتونه پیاوړي کوي.
د اسراییل لومړي وزیر ویلي: «دا چې موږ به په راتلونکو ۳۰ کلونو کې په کوم ځای کې یو، دا زموږ ځواک پورې تړاو لري. له همدې امله هغه څه چې موږ یې اوس کوو، د ځواک لا پیاوړتیا ده».
نوموړي د وسلو د خپلواکۍ ترلاسه کولو پر اړتیا هم ټینګار وکړ او ویې ویل: «زه د خپلو امریکایي ملګرو څخه ترلاسه شوي ملاتړ ته ډېر ارزښت ورکوم؛ خو موږ باید ځان په دې برخه کې خپلواک کړو او د ځان لپاره د وسلو خپلواک جوړښت جوړ کړو».
نتنیاهو زیاته کړه، چې اسراییل باید د اړتیا وړ وسلې تولیدولو وړتیا ولري او د نوې ټېکنالوژۍ پراختیا سره، سره د پوځي قوماندانانو نور نسلونه وروزي. هغه وويل: «موږ د وسلو خپلواک جوړښت ته اړتیا لرو او باید خپلې وسلې تولید کړو».
