اروپا کې ګرمه څپه؛ په فرانسه کې شاوخوا ۱۸ کسان مړه شوي دي
په فرانسه کې شاوخوا ۱۸ کسان د سختې ګرمۍ له امله مړه شوي دي. په قربانیانو کې دوه ماشومان هم شامل دي، چې په یوه موټر کې پاتې شوي وو. ورته مهال ګرمې څپې د اروپا پراخې سیمې نیولې دي او د دوشنبې په ورځ یې په څو ښارونو کې د تودوخې پخواني ریکارډونه مات کړل.
د فرانسې په بوردو ښار کې د هوا تودوخه ۴۱.۹ سانتيګرادو ته ورسېده او د تېرکال د اګست میاشتې ثبت شوی ریکارډ یې مات کړ. همدارنګه د فرانسې د مرکزي سیمې په پواتیه ښار کې تودوخه ۴۱.۲ سانتيګرادو ته لوړه شوه، چې د ۱۹۴۷ کال له ثبت شوي ریکارډ څخه هم زیاته ده.
د فرانسې د ملکي خوندیتوب ادارې چارواکو له خلکو غوښتي، یوازې په هغو سیمو کې لامبو ووهي چې تر څار لاندې وي. دغه خبرداری وروسته له هغې ورکړل شو، چې د یکشنبې او دوشنبې ترمنځ لږترلږه ۱۳ کسان په اوبو کې د ډوبېدو له امله مړه شوي دي. شمېرې ښيي، چې تېرکال په فرانسه کې د ګرمو څپو پرمهال په اوبو کې د ډوبېدو له امله د مړینې شمېر تر ۱۷۲ سلنې زیات و.
د لندن د امپیریال پوهنتون د هوا او چاپېریال برخې څېړونکې کلر بارنز ویلي، چې ګرمه هوا د افریقا له لویې صحرا څخه اروپا ته راخوځېږي او د یادې هوا د ډېر ورو حرکت له امله نږدې هېڅ باد یا یخه څپه نهشته چې هوا سړه کړي. هغې زیاته کړې، اقلیمي بدلون د ګرمو څپو او توپانونو شدت زیات کړی چې د تودوخې د لوړېدو او د سختو بارانونو د زیاتېدو لامل شوی دی.
د برېتانیا د هواپېژندنې ادارې هم ویلي، چې د دغه هېواد څلور ورځنۍ ګرمه څپه ښايي په ځینو سیمو کې تودوخه تر ۳۹ سانتيګرادو لوړه کړي. که دغه وړاندوینه رښتیا شي؛ نو د جون میاشتې پخوانی ریکارډ چې ۳۵.۶ سانتيګراد و او په ۱۹۵۷ او ۱۹۷۶ کلونو کې ثبت شوی و مات به شي.
په هسپانیا کې د هواپوهنې چارواکو ویلي، چې په ډېرو سیمو کې د هوا تودوخه د دغه فصل له عادي منځنۍ کچې څخه د ۵ تر ۱۰ سانتيګرادو لوړه ده او په ځینو شمالي سیمو کې دغه توپیر تر ۱۰ سانتيګرادو هم اوړي.
اېټالیا د دوشنبې په ورځ د ۱۲ ښارونو لپاره د سختې ګرمۍ خبرداری ورکړ. ګرمې څپې یوازې انسانان نهدي اغېزمن کړي؛ بلکې په بلجیم کې د ځنګلي ژوو د ساتنې فعالان وایي، هغه مرغان چې د کورونو تر چتونو لاندې ځالې جوړوي سخت زیانمن شوي دي.
