ټرمپ وايي د هرمز تنګي له لارې ۱۹ میلیونه بېرله تېل لېږدول شوي
د امریکا ولسمشر ډونالډ ټرمپ ویلي، چې د دوشنبې په ورځ د هرمز تنګي له لارې شاوخوا ۱۹میلیونه بېرله تېل تېر شوي او دا یې «تاریخي ریکارډ» بللی دی. امریکا ولسمشر ټرمپ ویلي چې ایران د اټومي پروګرام نامحدود څار منلی، خو ایران رد کړی.
رویټرز د ټرمپ له قوله لیکلي چې د دې هوکړې له مخې به د ایران کنګل شوې شتمنۍ د بشري اړتیاوو د توکو د اخیستو لپاره ځانګړو حسابونو ته ولېږدول شي او د نړیوالو اصولو تر څار لاندې به وکارول شي.
خو د ایران حکومت دا ادعا په کلکه رد کړې او ویلي یې دي چې له امریکا سره د اټومي پروګرام یا د نړیوالو څارونکو د بېرته ستنېدو په اړه هېڅ رسمي یا نهايي هوکړه نه ده شوې.
نړیوالو رسنیو راپور ورکړی چې د واشنګټن او تهران ترمنځ د خبرو اترو په اړه متضادې څرګندونې مخې ته راغلې دي، چې یو لوری د پرمختګ ادعا کوي او بل یې ردوي.
ایراني چارواکو ټینګار کړی چې د خپلو شتمنیو د کارولو پرېکړه یوازې د تهران حق دی او هېڅ بهرنی هېواد په دې موضوع کې د تصمیم واک نه لري.
