د بښنې نړېوال سازمان پر پاکستان غږ کړی چې بلوڅ فعالان سمدستي خوشې کړي
د پښنې نړيوال سازمان له پاکستاني چارواکو غوښتي باید هغه بلوڅ فعالان (ماهرنګ بلوڅ او صبغت الله شاه جي) سمدستي خوشې کړي چې له پټې محاکمې وروسته پر عمر بند محکوم شوي دي.
د سوېلي اسیا لپاره د بښنې نړیوال سازمان سرپرستې سیمه ییزې مشرې، ایزابل لاسي د کویټې د ترهګرۍ ضد محکمې لخوا بلوڅ فعالانو ماهرنګ بلوڅ او صبغت الله شاه جي ته د ټول عمر بند سزا اورولو په غبرګون کې وویل:
«دا پرېکړه چې د عادلانه محاکمې پر حق یو تېری دی، ښيي چې څنګه د پاکستان د ترهګرۍ ضد قوانین د سوله ییزو مخالفتونو د غلي کولو لپاره په ناوړه توګه کارول کېږي.»
هغې وويل، دا محکومیت او سزا د زندان په انګړ کې له یوې ګړندۍ او پټې محاکمې وروسته وشوه، چې د هغې په ترڅ کې د عادلانه محاکمې د نړیوالو معیارونو او قانوني پړاوونو په اړه جدي اندېښنې راپورته شوې.
همداراز د نړیوال سازمان مشرې زیاته کړه، ماهرنګ او ملګري یې یوازې د خپلو بشري حقونو د فعالیتونو له امله په نښه کېږي دوی باید سمدستي خوشې شي او د دوی له فعالیتونو سره تړلي ټول تورونه باید لیرې شي.
ماه رنګ بلوڅ چې د بلوڅ یووالي کمېټې مشره ده، د دوشنبې په ورځ د بلوچستان د ترهګرۍ ضد یوې محکمې ورته د «اېفسي» ځواک د یوه سرتېري د وژنې اړوند قضیه کې د عمري بند سزا واوروله.
