د کابل یو اوسېدونکی: طالبان مخابراتي شرکتونه د انټرنېټ د بیو لوړولو ته اړ باسي
د کابل یوه اوسېدونکي، چې له مخابراتي شبکو سره ځان نږدې ګڼي، افغانستان انټرنشنل پښتو ته په استولي پیغام کې ادعا کړې چې د طالبانو حکومت پر مخابراتي شرکتونو فشار راوړی څو د انټرنېټ بیې لوړې کړي او له دې سره انټرنیټ ته د خلکو لاسرسی محدود شي.
دغه کس ، چې د امنیتي اندېښنو له امله نه غواړي نوم یې خپور شي، ویلي چې د یوه مشهور مخابراتي شرکت یوه کارکوونکي چې د ده ملګری دی، ورته ویلي، د حکومت له لوري پر مخابراتي شبکو فشار زیات شوی څو د انټرنېټ خدمات په لوړه بیه وړاندې کړي.
د دغه کس په وینا، مخکې به د ۵۹۹ افغانیو په بدل کې شاوخوا ۴۰ جيبي انټرنېټ فعالېده، خو اوس په همدې بیه یوازې شاوخوا ۵ تر ۵،۵ جيبي انټرنېټ ترلاسه کېدای شي.
هغه ویلي په وروستیو میاشتو کې د هېواد په بېلابېلو سیمو کې د انټرنېټ د بیو او کیفیت په اړه د خلکو شکایتونه زیات شوي او یو شمېر کاروونکي وايي چې د خدماتو کیفیت د بیو له لوړوالي سره سمون نه لري.
په ورته وخت کې په کابل او مزارشریف کې څو تنو عامو ښاریانو ویلي، چې د انټرنیټ په بیو کې یې تر دې دمه تغییر نه دی لیدلی.
د یادونې وړ ده چې دا یوازې د کابل ښار د یوه اوسېدونکي روایت دی، افغانستان انټرنشنل پښتو په خپلواکه توګه د دغو ادعاوو د کرهوالي پخلی نه شي کولی.
