ډونالډ ټرمپ: د اټومي انرژۍ نړیوالې ادارې پلټونکي به په مناسب وخت ایران ته ولاړ شي
د امریکا ولسمشر ډونالډ ټرمپویلي، د ایران د اټومي فعالیتونو د څارنې لپاره به د اټومي انرژۍ د نړیوالې ادارې پلټونکي «په مناسب وخت» کې ایران ته ولاړ شي او خپلې دندې به ترسره کړي.
د رویټرز خبري اژانس د راپور له مخې، ټرمپ د سېشنبې په ورځ د امریکا پنسلوانیا ایالت ته د رسېدو پر مهال خبریالانو ته وویل چې د ایران اسلامي جمهوریت د اټومي انرژۍ د نړیوالې ادارې د پلټنو په اړه ناسم دریځ خپل کړی دی.
هغه ټینګار وکړ چې امریکا د ایران په اړه خپلې موخې په بریالیتوب سره پر مخ وړي او اصلي هدف یې دا دی چې ایران هېڅکله اټومي وسله ترلاسه نه کړي.
ټرمپ د دې پوښتنې په ځواب کې چې پلټونکي به څه وخت په عملي ډول ایران ته ولاړ شي، وویل: «په مناسب وخت کې، بېړه نشته، خو هغوی به په مناسب وخت کې هلته حاضر شي.»
د امریکا ولسمشر همداراز ادعا وکړه چې واشنګټن ایران په داسې وضعیت کې راوستی چې تر دې وړاندې هېڅ بل امریکایي حکومت نه و توانېدلی. د هغه په وینا، د ایران پوځي وړتیاوې سختې زیانمنې شوې او اوس تهران د مذاکراتو لپاره په قوي دریځ کې نه دی.
ټرمپ زیاته کړه چې سره له دې وضعیت څخه، په راتلونکې کې له ایران څخه ترلاسه کېدونکې پیسې به د امریکا کروندګرو ته ګټه ورسوي، څو ایران ته د جوارو، سویابینو او غنمو صادرات ترسره کړي.
هغه ادعا وکړه چې ایران اوس له اقتصادي ستونزو، د خوړو او درملو له کمښت او لوړې انفلاسیون سره مخ دی، او دا وضعیت د دغه هېواد پر کورني اقتصاد پراخ فشارونه وارد کړي دي.
