د افغانستان انټرنشنل – بښتو موندنې په ډاګه کوي چې تر اوسه پورې د طالبانو حکومت او د دغه ډلې لوړ پوړو چارواکو د افغان ستور مزلي عبدالاحد مومند پر مړینه هېڅ ډول رسمي او غیر رسمي غبرګون نه دی ښوولی. هممهاله پخوانیو ولسمشرانو محمد اشرف غني او حامد کرزي خواشیني ښوولې ده.
افغان ستور مزلی عبدالاحد مومند د جون میاشتې په ۲۱مه نېټه جرمني کې د سرطان ناروغۍ له امله ومړ. د دغه ستور مزلي مړینه ګڼو افغان سیاستوالو او یو شمېر بهرنیو بنسټونو لویه ضایع وبلله؛ خو طالبان یې لا هم په تړاو چوپه خوله دي.
په خواله رسنیو کې یو شمېر افغانانو غوښتنه کړې وه چې د هغه جسد باید په ډېر درناوي افغانستان ته لېږدول شوی وی او هلته خاورو ته سپارل شوی وی، خو طالبانو لا تر اوسه نه یوازې چې دغو غوښتنو ته ځواب نه دی ویلی بلکې په رسمي توګه یې د دغه افغان ستور مزلي د مړینې په تړاو هم هېڅ نه دي ویلي.
په خواله رسنیو کې یو شمېر افغان کاروونکو د طالبانو دغه چوپتیا غندلې او دا یې د افغانستان ل علمي قشر سره د دغه ډلې د کېنې یوه څرګنده بېلګه بللې ده.
مومند لومړنی کس و چې پښتو یې په فضا کې له اورېدل شویو لومړنیو ژبو وګرځوله او له ځان سره یې قران کریم یووړ.
مومند د ۱۳۶۷ کال په وږي میاشت کې د «سایوز ټيام-۶» فضايي ماموریت د غړي په توګه د میر فضايي سټېشن ته سفر وکړ او شاوخوا ۹ ورځې یې په فضا کې تېرې کړې.
مومند د دغه ماموریت په لړ کې د «لینین» نښان او د «شوروي اتحاد د اتل» لقب ترلاسه کړ.
مومند د ۱۳۳۷ کال په مرغومي میاشت کې په غزني ولایت کې په یوه بزګره کورنۍ کې زیږیدلی و او په افغانستان او پخواني شوروي اتحاد کې له زده کړو وروسته د افغانستان په هوايي ځواک کې شامل شو.
هغه لومړنی افغان او د نړۍ څلورم مسلمان و چې فضا ته یې سفر وکړ او لومړی مسلمان و چې قران کریم یې فضا ته یووړ.
