محمودخان اڅکزی: د پاکستان اوسنی حکومت ناقانونه دی
د پاکستان د ملي اسمبلۍ په غونډه کې د اپوزېسیون او د پښتونخوا ملي عوامي ګوند مشر محمودخان اڅکزي سختې نیوکې وکړې او حکومت یې ناقانونه وباله او د اپوزېسیون پر سیاسي فعالیتونو د بندیزونو او د ولسي حقونو د محدودولو په اړه یې جدي پوښتنې راپورته کړې.
محمودخان اڅکزي د ملي اسمبلۍ په غونډه کې د وینا پرمهال ویلي، چې اوسنی حکومت ناقانونه دی او د ولسواکۍ پر بنسټ د سیاسي ازادۍ پر وړاندې خنډونه جوړوي. نوموړي د پاکستان له لومړي وزیر شهباز شریف پوښتنه کړې، اپوزېسیون کوم جرم کړی چې د احتجاج او ولسي غونډو اجازه نه ورکول کېږي او ولې د سیاسي فعالیتونو په وړاندې محدودیتونه لګول شوي دي.
اڅکزي دا هم وویل، چې د اپوزېسیون غږ کمزوري کولو هڅې روانې دي او د ولس استازو ته د خپلې رایې او نظر د څرګندولو بشپړه ازادي نه ورکول کېږي. هغه ټینګار کړی، چې د ولسي حقونو او سیاسي ازادۍ د خوندیتوب لپاره باید بنسټیزو اصولو ته درناوی وشي او د سیاسي فشارونو لړۍ ودرېږي.
وروسته د پاکستان د ملي اسمبلۍ مشر مداخله وکړه او هغه ته یې خبرداری ورکړ، چې په پارلمان کې پر ملي ادارو نیوکې ونه کړي؛ خو اپوزېسیون دغه دریځ د بیان ازادۍ د محدودولو هڅه وبلله.
د غونډې پرمهال د پاکستان لومړي وزیر شهباز شریف د اڅکزي د څرګندونو په ځواب کې وویل، چې حکومت قانوني دی او ټولې پرېکړې د اساسي قانون له مخې کېږي.
