د ملګرو ملتونو د بشري چارو د همغږۍ دفتر (اوچا) د افغانستان استازې اولګا چیریفکو د افغانستان په ختیځو ولایتونو کې له زلزله ځپلو کورنیو سره د لیدنې پر مهال ویلي، چې له څلورو کلونو تېرېدو وروسته هم ګڼې کورنۍ له کړاوه ډک ژوند تېروي.
هغې ویلي، که بېړنۍ مرستې ونه رسېږي د دغه کورنیو ستونزې او کړاوونه به لا پسې زیات شي. اوچا د چهارشنبې په ورځ پر اېکس پاڼه د افغانستان ختیځو ولایتونو ته د اولګا چیریفکو د سفر ویډيو خپره کړې.
هغې ویلي: «له زلزلې د څلورو کلونو په تېرېدو لاهم ډېرې کورنۍ د دغه ناورین د اغېزو د جبران لپاره مبارزه کوي او د ژوند د اړتیاوو په برابرولو کې له ستونزو سره مخ دي». د هغې په خبره؛ د کال تر نیمايي پورې بشري مرستې یوازې ۱۷ سلنه تمویل شوې دي.
چیریفکو ویلي، د بشري مرستندویه ادارو له همکاریو سره، سره لا هم ګڼې دغه کورنۍ د سرپناه د نشتوالي ترڅنګ له زیاتو ستونزو سره مخ دي. هغې اندېښنه ښودلې، چې په سیمه کې اړتیاوې زیاتې دي او د بشري مرستو بودجه لاهم په خطرناک ډول کمه ده.
چیریفکو ویلي: «دغه خلک خیرات نه غواړي؛ هغوی زغم لرونکي، پیاوړي او د ستونزو پر وړاندې د مبارزې خلک دي؛ خو یوازې مقاومت او زغم بسنه نهکوي». نوموړې ټینګار کړی، چې باید د ملاتړ او خواخوږۍ خبرې په عملي اقداماتو بدلې شي؛ داسې اقدامات چې د رغونې، بیارغونې او د باثباته ژوند لپاره لاره هواره کړي.
