د ملګرو ملتونو مرستندویه ماموریت (یوناما) ویلي، د افغانستان د سولې، پراختیا او راتلونکې لپاره د ښځو اغېزمن حضور او د هغوی غږونه حیاتي ارزښت لري او باید افغان ښځو او نجونو ته د زدهکړو، رهبرۍ او ټولنیز ګډون فرصتونه برابر شي.
یوناما د ډیپلوماسۍ په برخه کې د ښځو نړۍوالې ورځې په مناسبت په خپره کړې خبرپاڼه کې ویلي، چې په نړۍواله همکارۍ، سولې او ټولګډونه پرېکړه نیونه کې د ښځو رول د ستاینې وړ دی.
د خبرپاڼې له مخې؛ ډیپلوماتې ښځې یوازې په نړۍوالو چارو کې ګډون نهکوي؛ بلکې د مشرانو، سوله جوړوونکو او د برابرۍ مدافعینو په توګه هم مهم رول لري او د هغوی غږونه د یوې عادلانه او باثباته نړۍ په جوړولو کې مرسته کوي.
یوناما زیاته کړې، چې په افغانستان کې پر عامه ژوند او د پرېکړو په بهیر کې د ښځو اغېزمن حضور ډاډمنول لاهم خورا مهمه چاره ده. د ملګرو ملتونو یادې ادارې ویلي، چې د سولې، پراختیا او د افغانستان د راتلونکې لپاره د ښځو غږونه حیاتي ارزښت لري او باید ورته د زدهکړو، رهبرۍ او د ټولنې په ټولو کچو کې د ګډون زمینه برابره شي.
په خبرپاڼه کې راغلي، چې افغان ښځې او نجونې باید وکولای شي په ځانګړې توګه د ډیپلوماسۍ او عامه خدمتونو په برخو کې فعاله ونډه واخلي. یوناما ټینګار کړی، چې کله ښځې په ټولنیزو او سیاسي بهیرونو کې شاملې وي؛ ټولنې لا پیاوړې، مقاومې او سولهییزې کېږي.
