نادرا ته د افغان کډوالۍ کارتونو لغوه کولو تر ۲۶زره ډېرې غوښتنې رسېدلې دي

نادرا وایي، ډېری غوښتونکي هغه کسان دي چې ځانونه پاکستانیان بولي؛ خو پخوا یې د بېلابېلو لاملونو له امله د افغان کډوالۍ اسناد ترلاسه کړي وو. د پاکستان د ملي معلوماتو او ثبت ادارې (نادرا) د پېښور سترې محکمې ته په خپل ځواب کې ویلي، چې د افغان تابعیت او کډوالۍ کارتونو د لغوه کولو لپاره ورته تر ۲۶زره زیاتې غوښتنې رسېدلې دي.
د راپور له مخې؛ په دغه غوښتنو کې ډېری هغه کسان شامل دي، چې ځانونه د پاکستان وګړي بولي؛ خو په تېرو کلونو کې یې د افغان کډوالو د ثبت کارتونه (پي او ار ) یا د افغان تابعیت کارتونه (اې‌سي‌سي) ترلاسه کړي وو او اوس غواړي دغه اسناد لغوه شي.
نادرا محکمې ته ویلي، چې له ټولو ثبت شویو غوښتنو څخه یې ۱۷زره او ۸۸۴ قضیې رد کړې؛ ځکه غوښتونکي یې ونه توانېدل، چې خپل پاکستانی تابعیت ثابت کړي. د یادې ادارې په وینا؛ ۲زره او ۲۰۰ کسانو ته د اسنادو تر ارزونې وروسته د پاکستاني تابعیت د تصفیې سندونه ورکړل شوي دي.
همداراز نادرا ویلي، چې ۶زره او ۶۳۷ غوښتونکي د تصدیق لړۍ لپاره حاضر شوي نه‌دي او د هغوی دوسیې لاهم ځنډېدلې دي. د راپور له مخې؛ ځینو کسانو د مالي مرستو ترلاسه کولو لپاره افغان کارتونه اخیستي وو.
ویل کېږي، چې هغه مهال د ملګرو ملتونو له‌خوا د هر ثبت شوي افغان کډوال په بدل کې د ۴۰۰ امریکايي ډالرو مرسته ورکول کېده. ځینو نورو کسانو بیا د بهرنیو هېوادونو د پناه غوښتنې اسانتیا لپاره د افغان کډوالۍ اسناد ترلاسه کړي وو.
د پېښور سترې محکمې د ۱۲۷ غوښتونکو په یوه قضیه کې پرېکړه کړې، چې هغوی باید د محکمې پر ځای لومړی له نادرا سره خپلې دوسیې وڅاري. د محکمې په ۲۱ مخیزه پرېکړه کې راغلي، چې نادرا مکلفه ده د هر غوښتونکي د دوسیې په اړه په څلورو میاشتو کې پرېکړه وکړي.
محکمې همداراز نادرا ته لارښوونه کړې، چې د ثبت مرکزونو کې ورغلو غوښتونکو ته د غوښتنلیک رسید او ټوکنونه ورکړي او که اسناد بشپړ وي؛ دوسیې دې د ځانګړي تایید بورډ ته واستول شي.
د پاکستان حکومت له ۲۰۲۳ کال راهیسې د افغان کډوالو د بېرته ستنولو بهیر پیل کړی او په وروستیو پړاوونو کې یې د «پي او ار» او «اې‌سي‌سي» کارت لرونکو افغانانو ته هم د پاکستان د پرېښودو امر کړی دی.