امریکا د ایران له بریدونو څو میاشتې وروسته په کویت کې خپل سفارت بېرته پرانیست
خلیج ته د امریکا د بهرنیو چارو وزیر مارکو روبیو له سفرسره هممهاله، په کویت کې د امریکا سفارت خپل فعالیتونه بېرته پیل کړل. دغه سفارت څو میاشتې مخکې د ایران د بریدونو له امله تړل شوی و.
د امریکا د بهرنیو چارو وزارت یوه ویاند ویلي چې په کویت ښار کې ددوی سفارت به سملاسي د امریکايي وګړو لپاره بېړني کونسلي خدمات بېرته پیل کړي او نور خدمات به په تدریجي ډول فعال کړي.
د امریکا د بهرنیو چارو وزارت د روان کال په مارچ میاشت کې په کویت او سعودي عربستان کې د خپلو سفارتونو فعالیتونه هغه مهال وځنډول، چې ایران د امریکا او اسراییل له بریدونو وروسته د دغو ماموریتونو پر لور بېپیلوټه الوتکې واستولې.
مارکو روبیو د امریکا د بیرغ د پورته کولو په مراسمو کې ګډون وکړ.
روبیو له مراسمو وروسته په ټولنیزو رسنیو کې ولیکل: «د امریکا بیرغ، چې د ازادۍ، یووالي او ازاد ژوند سمبول دی، یو ځل بیا په ویاړ سره د کویت ښار پر سر رپېږي. کویت د سیمې د امنیت او ثبات لپاره یو نه جلا کېدونکی شریک دی».
