د کندهار د سوداګرۍ او پانګونې خونې مرستیال انجینر عبدالباقي بینا وایي، چې په تېر ۱۴۰۴کال کې له کندهار نه ۱۸۲زره ټنه وچه او تازه مېوه بهرنیو هېوادونو ته صادره شوې ده. نوموړي ویلي، چې د دغه صادراتو ټول ارزښت له ۴۲۸ مېلیونه او ۸۶۳زره امریکايي ډالر زیات وو.
انجینر عبدالباقي بینا ویلي، چې له کندهار نه بهرنیو هېوادونو ته ۱۰۱زره او ۳۸۵ ټنه وچه او تر ۸۰زره او ۹۹۶ ټنه تازه مېوه صادره شوې. د هغه په خبره؛ د دغه مېوو زیاته برخه هند ته لېږدول شوې، يوشمېر یې پاکستان، قطر، متحده عربيامارتو، روسیې او د منځنۍ اسیا هېوادونو ته هم صادره شوې ده.
تر دې وړاندې د افغانستان د وچې مېوې د صادرونکو ټولنې مشر عبدالقاسم امرخېل ویلي و، چې د افغانستان وچه مېوه شاوخوا ۳۰ هېوادونو ته صادرېږي. د هغه په وینا؛ په نړۍوال بازار کې د وچې مېوې غوښتنه مخ په زیاتېدو ده او د افغانستان مېوه د خپل طبیعي کیفیت له امله ځانګړی ځای لري.
یوشمېر سوداګر بیا وايي، د ایران وروستۍ جګړې یې پر صادراتو اغېز کړی او د لارو بندېدو له کبله د مېوو ډک ګڼ کانټیرونه بند پاتې دي. مسوولین وایي، د کندهار کرنیز محصولات هر کال د پاکستان، هند، متحده عربي اماراتو، چین او یوشمېر نورو هېوادونو بازارونو ته صادرېږي.
سوداګر او د کرنې سکتور فعالان وایي، د صادراتو د زیاتوالي لپاره د ترانزیټ اسانتیاوو، سړو خونو، معیاري بسته بندۍ او نړۍوالو بازارونو ته د لاسرسي پراختیا مهمه اړتیا ده.
