په جنوبي وزیرستان کې د پولیسو د حوزې د مشر په ګډون ۶ پولیس تښتول شوي
د جنوبي وزیرستان ولسوالۍ په سراروغه علاقدارۍ کې نامعلومو وسلهوالو د پولیسو د یوه افسر (ایس ایچ او) احمد شاه په ګډون شپږ پولیس سرتېري تښتولي دي.
د ولسوالۍ د امنیه قوماندان په وینا، دغه پولیس د یوې چاودنې له سیمې څخه تر لیدنې وروسته د ستنېدو پرمهال تښتول شوي دي.
د پولیسو سرچینو ویلي چې په لاره کې وسلهوالو مخکې له مخکې سړک تړلی و. وسلهوالو د پولیسو موټر درولی او وروسته یې ایس ایچ او او د هغه نور ملګري تښتولي دي.
پولیسو د پېښې پخلی کړی او ویلي یې دي چې د تښتول شویو کسانو د موندلو لپاره هڅې روانې دي.
تر اوسه د تښتول شویو پولیسو د تښتونې مسوولیت کومې ډلې نه دی منلی.
