د طالبانو مرستیال ویاند حمدالله فطرت په افغانستان کې د نشهيي توکو د کمښت اړوند د روسیې د امنیت شورا سرمنشي سرګي شویګو د وروستیو څرګندونو هرکلی کړی. شویګو په خپلو وروستیو څرګندونو کې ویلي و، چې په افغانستان کې د نشهیي توکو تولید ۹۰ سلنه کم شوی دی.
فطرت د چهارشنبې په ورځ (د چنګاښ ۳مه) ویلي، د خپل جدي سیاست او اقداماتو په پایله کې یې د نشهيي توکو کښت او تولید نږدې صفر ته رسولی دی. هغه زیاته کړې: «د نشهیي توکو د کښت، تولید او قاچاق د کمښت په اړه د روسیې امنیت شورا سرمنشي سرګي شویګو څرګندونې مثبتې ارزوو. حقیقت دا دی، چې له نشهيي توکو سره د مبارزې په برخه کې پراخه عملي او بېساري اقدامات ترسره شوي».
د روسیې د ملي امنیت شورا منشي سرګي شویګو ویلي، طالبانو د نشهيي توکو پر وړاندې د مبارزې په برخه کې پر خپلو ژمنو عمل کړی او توانېدلي چې د نشهیي توکو تولید او قاچاق تر ډېره لهمنځه یوسي.
طالبانو واک ته له بېرته رسېدو وروسته په ټول افغانستان کې د نشهيي توکو کر، تولید او قاچاق منع اعلان کړل. که څه هم نړۍوالې شمېرې د کوکنارو په کر کېله کې د پام وړ کمښت ښيي؛ خو دغه پدیده په بشپړه توګه لهمنځه نهده تللې او لا هم په ځینو ولایتونو کې دوام لري.
د طالبانو مرستیال ویاند حمدالله فطرت زیاته کړې، د یادې ډلې هڅې لا هم روانې دي؛ څو «دغه ناوړه پدیده په بشپړه توګه» لهمنځه یوسي.
بل لور ته ملګرو ملتونو خبرداری ورکړی، چې د کوکنارو د کښت کمېدو ترڅنګ په افغانستان کې د صنعتي نشهيي توکو تولید مخ په زیاتېدو دی. د ملګرو ملتونو د نشهیي توکو او جرمونو پر ضد دفتر راپور ورکړی، سره له دې چې د کوکنارو کښت شل سلنه کم شوی؛ خو د صنعتي نشهيي توکو او په ځانګړې توګه د مېتامفتامین یا «شیشې» تولید مخ پر زیاتېدو دی.
