د پکتیا په لرې پرتو سیمو کې زدهکوونکي د موبایل بندیز له امله اندېښمن دي
د پکتیا ولایت د ډنډې پټان ولسوالۍ یو شمېر اوسېدونکي وايي، د طالبانو له لوري ښوونځیو ته د ټیلیفونونو پر وړلو بندیز زدهکوونکي له ګڼو ستونزو سره مخ کړي. دوی وایي چې ډیورنډ کرښې نږدې ژوند کوي او د موبایل کارونې بندیز له پېښو وروسته خپلو کورنیو ته د خبر ورکولو له مشکل سره مخ کړي.
دغو اوسېدونکو افغانستان انټرنشنل پښتو ته ویلي، د ولسوالۍ له لرې پرتو سیمو څخه هره ورځ د زدهکړو لپاره د ولسوالۍ مرکز ته ځي، خو د ښوونځیو د ادارو او طالب چارواکو له خوا ورته ویل کېږي چې ښوونځي ته ټیلیفونونه نه شي راوړلی.
د سیمې اوسېدونکي وايي، دوي له ډيورند کرښې ته نږدې ژوند کوي او په دغه سیمو کې وخت ناوخت د پاکستاني ځواکونو له لوري ډزې، هاواني بریدونه او د درنو وسلو مرمۍ لګېږي، چې له امله یې خلک د امنیتي وضعیت په اړه د پرلهپسې معلوماتو ترلاسه کولو ته اړتیا لري.
دوی زیاتوي چې د ټیلیفونونو نه شتون زدهکوونکي له خپلو کورنیو او کلیو سره له اړیکې محروموي او د هر ډول بېړنیو امنیتي پېښو پر مهال د خبرتیا ترلاسه کول ورته ستونزمن کوي.
د سیمې د اوسېدونکو په وینا، زدهکوونکي کله ناکله د خپلو سیمو د وضعیت د معلومولو لپاره له جدي اندېښنو سره مخ وي، ځکه د ټیلیفوني اړیکو نشتوالی د هغوی او کورنیو ترمنځ د معلوماتو تبادله محدودوي.
په وروستیو میاشتو کې د هېواد په یو شمېر ولایتونو کې د ښوونکو او زدهکوونکو لپاره د ځیرک موبایلونو د کارولو او ښوونځیو ته د وړلو په اړه د محدودیتونو راپورونه خپاره شوي دي.
