افغانستان انټرنشنل ـ پښتو، بلوچستان
د بلوچستان په بېلابېلو بلوڅ مېشتو سیمو کې د بلوڅانو د یووالي کمېټې له لوري د اعلان شوي کاربندیز له امله بازارونه او کاروباري مرکزونه تړلي دي. دغه کاربندیز د یادې کمېټې مشرې ماهرنګ بلوڅ او یو بل غړي صبغت الله ته د ترهګرۍ ضد محکمې لهخوا د اورول شوې عمري بند سزا پرضد ترسره کېږي.
د بلوڅانو د یووالي کمېټې لهخوا په بلوچستان کې د اعلان شوي کاربندیز له امله د کوټې په ګډون په ګوادر، کیچ، اواران، پنجګور، خضدار، مستونګ او نورو سیمو کې بازارونه تړل شوي او ورځني فعالیتونه اغېزمن شوي دي.
دغه کاربندیز وروسته له هغې پیل شوی، چې د کوټې د ترهګرۍ ضد محکمې د روانې میاشتې په ۲۲مه نېټه ماهرنګ بلوڅ او صبغت الله د ۲۰۲۴کال د ګوادر د یوې احتجاجي غونډې پرمهال د یوه سرتېري د وژنې په تور په عمري بند محکوم کړل.
د سزا تر اعلان وروسته د بلوچستان سر وزیر میر سرفراز بګټي پر اېکس پاڼه کاږلي و، چې وژل شوي سرتېري ته له دوو کلونو وروسته انصاف ورکړل شو او دا یې د عدالت بریالیتوب بللی و.
بلخوا د بلوچستان نېشنل ګوند مرستیال مشر ساجد ترین له افغانستان انټرنشنل پښتو سره په خبرو کې ویلي، چې د ماهرنګ بلوڅ او نورو نیول شویو کسانو د قضیو او د هغوی د سزاوو په اړه جدي اندېښنې شته.
نوموړي ویلي، چې د بشري حقونو نړۍوال سازمانونه او فعالان داسې قضیې د بشري حقونو له بنسټیزو اصولو سره تړلې بولي او پرې اندېښنه څرګندوي. ساجد ترین زیاته کړې، دغه ډول قضیې د عدالت پر نظام او د خلکو د حقونو پر وضعیت پوښتنې راپورته کوي او اړتیا ده چې د حکومتي ادارو اقدامات د قانون او رڼو عدلي اصولو له مخې و ارزول شي.هغه ویلي، چې په بلوچستان کې د ځوانانو د نیولو او د هغوی د حقونو په اړه هم پراخ بحثونه روان دي او دغه وضعیت د خلکو ترمنځ نارضایتي زیاته کړې ده. نوموړي ټینګار کړی، چې د ستونزو د حل لپاره باید د قانون حاکمیت، بشري حقونو ته درناوی او سیاسي مکالمه پیاوړې شي؛ څو د سیمې د بېثباتۍ مخه ونیول شي.
