د پکتیا ولایت د احمدخېلو ولسوالۍ یو شمېر اوسېدونکو افغانستان انټرنشنل پښتو ته په رالیږلي پیغام کې ویلي، چې طالبانو پر ښوونکو نوي محدودیتونه لګولي. ددوی په وینا، د ښوونځیو له استادانو څخه ځیرک موبایلونه راټول شوي او د ځینو استادانو موبایلونه مات شوي هم دي.
د احمدخېلو دغه اوسېدونکي وايي، استادانو ته سپارښتنه شوې چې یوازې ساده موبایلونه وکاروي او د ځیرک موبایل له کارولو ډډه وکړي.
د شکایت کوونکو په وینا، دغه محدودیت یوازې د ښوونځي تر چاپېریال محدود نه دی، بلکې استادان نه شي کولای په خپلو کلیو او کورونو کې هم په ښکاره ډول ځیرک موبایل وکاروي.
پیغام لیږونکي ادعا کوي چې ښوونکي اړ دي خپل ځیرک موبایلونه له طالبانو پټ وساتي او د کارولو پر مهال له ستونزو او احتمالي سزاوو وېره لري.
دوی زیاتوي، دا لومړی ځل نه دی چې د احمدخېلو ولسوالۍ پر ښوونکو محدودیتونه لګول کېږي. دوی وایي، له دې وړاندې هم استادانو ته خبرداری ورکړل شوی و چې په ودونو، مېلو او نورو ټولنیزو مجلسونو کې له ګډون څخه ډډه وکړي.
دوی همدارنګه وایي چې له ټولو ښوونکو غوښتل شوي وو څو ږیرې پرېږدي او دا پرېکړه په پراخه کچه عملي شوې ده.
د یادونې وړ ده چې دا یوازې د پکتیا ولایت د احمدخېلو ولسوالۍ د یو شمېر اوسېدونکو روایت دی، افغانستان انټرنشنل یې په خپلواکه توګه نه تاییدوي.
