د خېبر پښتونخوا ایالت د بنو ولسوالۍ د ککي تاڼې اړوند شاهري بهرت سیمه کې د دوو ډلو ترمنځ د شخړې پر مهال ډزې شوې، چې په پایله کې یې پنځه کسان وژل شوي دي. د پولیسو په وینا؛ شخړه لومړۍ لفظي وه خو وروسته په وسلهواله نښته واوښته او د یوې ډلې کسانو پر بلې ډلې ډزې وکړې.
په پېښه کې یوه ښځه، د هغې دوه زامن او یو بل کس ځای پرځای وژل شوي، په داسې حال کې چې یوه نجلۍ او بل کس ټپیان شوي وو. وروسته یو ټپي هم په روغتون کې د سختو ټپونو له امله ساه ورکړه چې له امله یې د وژل شویو کسانو شمېر پنځو ته لوړ شو.
تر یادې پېښې وروسته پولیس او د ژغورنې ډلې سیمې ته رسېدلې او مړي او ټپیان یې روغتون ته لېږدولي دي. پولیس وايي، د پېښې په تړاو یې د پلټنې او نیونې عملیات پیل کړي دي.
د طالبانو د عدلیې وزیر عبدالحکیم شرعي په خپل شخصي زندان کې د شیعهګانو تر نیول کېدو وروسته د کابل د څلورو حوزو له امنیتي چارواکو سره ولیدل او هغوی ته یې امر وکړ، چې امنیت ټینګ کړي او د ګډوډۍ مخه ونیسي. هغه د طالبانو د مشر هبت الله اخوندزاده د امرونو پر اطاعت هم ټینګار وکړ.
د طالبانو د عدلیې وزارت د پنجشنبې په ورځ (د چنګاښ ۴مه) په یوه خبرپاڼه کې ویلي، چې عبدالحکیم شرعي په دغه لیدنه کې د عامه نظم د ساتلو لپاره د امنیتي ادارو همکاري مهمه بللې او د کابل د امنیتي حوزو له مسولینو یې غوښتي، چې دې برخې ته جدي پاملرنه وکړي.
نوموړي همداراز د طالبانو د امنیتي مسوولینو او د دولتي ځمکو د غصب مخنیوي کمېسیون ترمنځ د همکارۍ پر پیاوړتیا ټینګار کړی. هغه ویلي، چې یاد کمېسیون د غصب شویو ځمکو د بېرته ترلاسه کولو بهیر په «جديت او قاطعیت» سره روان ساتي.
د طالبانو د عدلیې وزارت په وینا؛ د امنیتي حوزو امرینو ډاډ ورکړی چې د عامه نظم د ټینګښت، د غصب شویو ځمکو د بېرته ترلاسه کولو او د هبتالله اخوندزاده د حکمونو د عملي کولو په برخه کې به همکاري کوي.
دا په داسې حال کې ده، چې د طالبانو د عدلیې وزیر عبدالحکیم شرعي د دوشنبې په ورځ په کابل ښار کې د محرم د بېرغونو او نښو پورته کولو له امله تر۳۰ زیات شیعه وګړي په خپل شخصي زندان کې ساتلي وو.
عبدالحکیم شرعي د چهارشنبې په ورځ د طالبانو د رییسالوزرا او د کورنیو چارو د وزیر له لارښوونې وروسته یاد کسان له خپل شخصي زندان څخه خوشې کړل. ورته مهال د طالبانو امنیتي ځواکونو د عدلیې وزیر په امر په کابل کې د خصوصي تلویزیون تمدن مرکزي دفتر ته ورننوتل او خپرونې یې ودرولې.
د یادې رسنۍ مسوولینو پرون ویلي وو، چې ناپېژانده کسان د دغه ټلوېزیون وسایل او تجهیزات له ودانۍ څخه انتقالوي. عبدالحکیم شرعي د طالبانو له پیاوړو وزیرانو څخه شمېرل کېږي. نوموړی د رسمي زندانونو ترڅنګ شخصي زندان هم لري او په تېرو څو کلونو کې یې د ځمکو د شخړو او نورو قضیو په تړاو یوشمېر کسان نیولي او بندیان کړي دي.
د طالبانو مرستیال ویاند حمدالله فطرت وايي، د افغانستان په اړه د ډلهییز امنیت تړون سازمان اندېښنې بېځایه دي. یاد سازمان ویلي، په افغانستان کې روان امنیتي وضعیت لاهم د دوی لپاره تر ټولو جدي اندېښنه ده.
د طالبانو مرستیال ویاند حمدالله فطرت د پنجشنبې په ورځ (د چنګاښ ۴مه) ویلي، چې واک ته د یادې ډلې له رسېدو وروسته د دوی امنیتي ځواکونه د هېواد پر ټوله جغرافیه بشپړ واکمن دي.
د ډلهییز امنیت تړون سازمان د دایمي شورا مشر وېکټور واسیلیف ویلي، که څه هم روسیه او د منځنۍ اسیا ځینې هېوادونه له طالبانو سره د اړیکو هڅه کوي؛ خو په افغانستان کې امنیتي وضعیت لاهم پېچلی دی او د ثبات نښې نه لیدل کېږي.
نوموړي ټینګار کړی، چې د افغانستان له شمالي پولو سره نږدې وسلهوالې ډلې او جنګیالي د سازمان د غړو هېوادونو، په ځانګړي ډول تاجکستان لپاره جدي امنیتي ګواښ جوړوي او د دغه ډلو پر ضد به ګډ عملیات لا پراخ شي.
خو فطرت زیاته کړې، چاته اجازه نهورکوي چې د افغانستان خاوره د نوور هېوادونو په وړاندې وکاریږي. هغه ویلي: «دا د افغانستان اصولي دریځ دی، چې چاته اجازه نهورکوي له افغانستان نه نورو ته خطر متوجه شي او نه هم افغانستان نورو وسلهوالو ډلو ته د فعالیت اجازه ورکوي».
د یاد سازمان په وینا؛ پلان لري چې د افغانستان په شمالي پولو کې د وسلهوالو ډلو د نفوذ د مخنیوي لپاره خپلې ګډې هڅې زیاتې کړي؛ ځکه دغه ډلې د سیمهییز امنیت لپاره مستقیم ګواښ بلل کېږي.
د طالبانو مخالفې ډلې ازادۍ جبهې یوه ویډیو خپره کړې او ویلي یې دي، چې په لغمان ولایت کې یې د طالبانو پر مرکزونو راکټي برید کړی دی. یادې جبهې زیاته کړې، چې طالبانو ته یې مرګ ژوبله اړولې؛ خو د مرګژوبلې کره شمېر په اړه یې څه نهدي ویلي.
د ازادۍ جبهې په وینا؛ د دوی ځواکونو د چهارشنبې په ورځ (د چنګاښ ۳مه) د ماسپښین شاوخوا ۱:۳۰ بجه د لغمان ولایت د الینګار ولسوالۍ د نورلام بابا په دره کې د قولوک په کلي کې د طالبانو پر یوې اډې برید وکړ.
د یادې جبهې لهخوا په خپرې شوې خبرپاڼه کې ویل شوي، چې نښته د راکټ او کوچنیو وسلو ډزو سره پیل شوه او شاوخوا ۱۵ دقیقې یې دوام وکړ. د افغانستان د ازادۍ جبهې ادعا کړې، چې په برید کې طالبانو ته مرګ ژوبله اوښتې؛ خو د مرګ ژوبلې د کره شمېر په اړه یې کره معلومات نهدي وړاندې کړي.
دغه جبهې ویلي، په عملیاتو کې د دوی جنګیالیو ته زیان نهدی رسېدلی. د طالبانو ځایي چارواکو لاتراوسه په رسمي ډول د برید یا د هغې د احتمالي تلفاتو په اړه څه نهدي ویلي.
ترکیې ته د افغانستان د سوداګرو تللي پلاوي د دغه هېواد له سوداګرو غوښتنه کړې، چې په افغانستان کې د کانونو او وچې مېوې په برخو کې پانګونه وکړي. په دغه لیدنو کې د دواړه هېوادونو ترمنځ د اقتصادي او سوداګریزو اړیکو پر پراختیا هم ټینګار شوی.
ترکیې ته د بلخ د سوداګرۍ او پانګونې خونې د مشر محمد ابراهیم غضنفر په مشرۍ تللي پلاوي له ترکي سوداګرو سره د کانونو، وچې مېوې، کرنې او بېلابېلو برخو کې د پانګونې او دوه اړخیزو همکاریو پر پراختیا خبرې کړې.
غضنفر په دغه ناستو کې افغانستان د کورنۍ او بهرنۍ پانګونې لپاره مهم مرکز یاد کړی او د دواړه هېوادونو د خصوصي سکټور د تجریو شریکولو، تخنیکي همکاریو زیاتېدو، پانګونې او تګراتګ غوښتنه یې کړې.
نوموړي زیاته کړې، چې د نورو برخو ترڅنګ د تولیدي صنعتونو برابرول د افغانستان له مهمو اړتیاوو څخه دي او د ترکیې پانګهوالو ته یې په افغانستان کې د پانګونې لپاره بلنه ورکړې ده. د دواړو هېوادونو سوداګرو د اړیکو د پراختیا، د پانګونې د زیاتېدو او اقتصادي پرمختګ هیله ښودلې.
ځايي سرچینو افغانستان انټرنشنل ته ویلي، چې د فراه ولایت د پرچمن ولسوالۍ یو شمېر اوسېدونکو د سړک جوړونې د یوې پروژې د لېږد پر ضد اعتراضي لاریون کړی او د یادې ولسوالۍ د طالب ولسوال د ګوښه کېدو غوښتنه یې کړې ده.
د سرچینو په وینا، دغه پروژه په اصل کې د «تحت پرچمن» سیمې لپاره د یوې موسسې له لوري په پام کې نیول شوې وه، خو طالب ولسوال هغه د «نزګان» سیمې ته، چې د نوموړي د اوسېدو او زېږېدو سیمه بلل کېږي، لېږدولې ده.
لاریونوال وایي چې د پروژې په لېږد سره د پرچمن ولسوالۍ اوسېدونکي د سړک له جوړېدو او ورسره تړلو کاري فرصتونو څخه بېبرخې شوي دي.
دوی ادعا کوي چې د موسسې کارکوونکو هم ورته ویلي چې طالب ولسوال د فشار له لارې هغوی دې پرېکړې ته اړ کړي او د مخالفت امکان ورسره نه لري.
د سرچینو په خبره، طالبانو له دې اعتراض وروسته د یوې سیمې ارباب هم نیولی دی. ویل کېږي چې نوموړي د اعتراض کوونکو په منځ کې وینا کړې وه او له همدې امله د روانې اوونۍ په ترڅ کې ونیول شو.
په هغې ویډیو کې چې د چهارشنبې په ورځ افغانستان انټرنشنل ته رسېدلې، اعتراض کوونکي د پروژې د لېږد پرېکړه غندي او خبرداری ورکوي چې که دا پرېکړه عملي شي، د موسسې دفتر به وتړي.
اعتراض کوونکو همداراز د «موږ دا ولسوال نه غواړو» شعارونه ورکړي او د طالب ولسوال د لرې کولو غوښتنه یې کړې ده.
پرچمن ولسوالۍ د فراه ولایت له غرنیو او لرې پرتو سیمو څخه ده. د سختو لارو او د ولایت له مرکز څخه د واټن له امله، د سړک جوړونې پروژې د سیمې د اوسېدونکو لپاره ځانګړی اهمیت لري او د تګ راتګ، سوداګرۍ او اقتصادي فعالیتونو په اسانتیا کې مهم رول لوبوي.