ټېلګراف ورځپاڼې په یوه تحلیلي راپور کې ویلي، د افغانستان له اوسنیو واکمنو سره د نړۍوالې ټولنې د نه تعامل تګلاره نهده توانېدلې چې د افغان ښځو، بشري حقونو او امنیتي ستونزو په برخه کې بدلون راولي؛ بلکې د دغه هېواد اقتصادي او بشري وضعیت یې لا پسې ستونزمن کړی دی.
په راپور کې راغلي، افغانستان چې شاوخوا ۴۰ مېلیونه نفوس لري؛ اوس هم د نړۍ له بېوزله هېوادونو شمېرل کېږي او مېلیونونه خلک یې بشري مرستو ته اړ دي. د راپور له مخې؛ کمزوری اقتصاد، بېکاري او د بنسټیزو خدمتونو نشتوالي د خلکو د نهیلۍ او کډوالۍ کچه لوړه کړې ده.
راپور کاږي، د افغانستان انزوا د افراطي ډلو د فعالیت لپاره زمینه برابروي او د داعش خراسان څانګه لاهم د سیمې او نړۍ لپاره یو امنیتي ګواښ بلل کېږي. په راپور کې د ملګرو ملتونو ارزونې ته په اشارې ویل شوي، چې دغه ډله لاهم د جلب و جذب او له افغانستان نه بهر د بریدونو د الهام ورکولو وړتیا لري.
راپور زیاتوي، چې د طالبانو له بیا واکمنېدو وروسته د ښځو او نجونو پر زدهکړو، کار او ټولنیز حضور پراخ محدودیتونه لګېدلي. همداراز راپور کې ویل شوي، چې یوازې له لرې نیوکه کول د دغه وضعیت د بدلون لپاره اغېزمنه وسیله نهده.
د راپور له مخې؛ چین په وروستیو کلونو کې په افغانستان کې خپل اقتصادي حضور پراخ کړی او د دغه هېواد د کانونو او طبیعي سرچینو په برخه کې پانګونې ته لېوالتیا ښيي. راپور کې خبرداری ورکړل شوی، چې د لوېدیځ دوامداره بېپامي ښايي افغانستان د نورو قدرتونو د نفوذ تر سیوري لاندې راولي.
راپور ټینګار کوي، چې له طالبانو سره تعامل د هغوی د رسمیت پېژندنې معنا نهلري؛ بلکې د افغانستان د راتلونکي، امنیت، اقتصادي ثبات او د افغان ښځو د حقونو د ملاتړ لپاره د اغېزمن نفوذ یوه وسیله ګڼل کېدای شي.
د راپور په پای کې ویل شوي، چې د افغانستان د ثبات، اقتصادي ودې او د خلکو د ژوند د ښه کېدو لپاره یوازې انزوا کافي نهده او نړۍواله ټولنه باید د خبرو اترو او عملي تعامل له لارې د افغانستان په راتلونکي کې رغنده رول ولوبوي.
