مارکو روبیو: امریکا به له ایران سره په مذاکراتو کې د خلیج هېوادونو ګټې خوندي وساتي
د امریکا د بهرنیو چارو وزیر مارکو روبیو ویلي، چې واشنګټن به له ایران سره د منځني ختیځ د جګړې د پای ته رسېدو لپاره په روانو مذاکراتو کې د فارس خلیج هېوادونو امنیتي او ستراتیژیکې ګټې په پام کې ونیسي.
د فرانسې خبري اژانس د راپور له مخې، روبیو د چهارشنبې په ورځ کویټ ته د سفر پر مهال د خلیج هېوادونو متحدانو ته ډاډ ورکړ چې امریکا به له تهران سره په خبرو اترو کې «په بشپړه توګه له خپلو خلیجي شریکانو سره همغږې» وي او هغوی به د مذاکراتو اړوند پرېکړو او پرمختګونو څخه خبروي.
نوموړي ټینګار کړی چې واشنګټن به «هېڅ داسې اقدام ونه کړي چې د خپلو متحدانو امنیت کمزوری کړي».
د روبیو دغه څرګندونې په داسې حال کې مطرح کېږي چې د امریکا ولسمشر ډونالډ ټرمپ د مارک روټه سره په سپینه ماڼۍ کې د لیدنې پر مهال ویلي وو چې د امریکا او ایران ترمنځ مذاکرات «ډېر ښه روان دي».
بل لور ته، روبیو په خپلو خبرو کې د هرمز تنګي د وضعیت په اړه هم دریځ څرګند کړی او ویلي یې دي چې امریکا غواړي د جګړې له پیل وړاندې حالت وساتل شي او د بېړیو تګ راتګ د اضافي لګښتونو او محصولاتو له اخیستو پرته دوام ومومي.
هغه په کویټ کې وویل چې داسې هېڅ هېواد نه پېژني چې د هرمز تنګی د کارونې په بدل کې د محصول اخیستو ملاتړ وکړي.
