د چمن سوداګرۍ خونې مسوولین وايي، له تېرو اتو میاشتو راهیسې د پاکستان او افغانستان ترمنځ د چمن ـ سپین بولدک د دوستۍ دروازې تړل پاتې کېدو له امله دواړه خواوو ته درانه اقتصادي زیانونه اوښتي او د سوداګرۍ، ټرانزیټ او تګراتګ بهیر ورسره سخت اغېزمن شوی دی.
د سوداګرو په وینا؛ د لارې تړل کېدو له امله زرګونه بار وړونکي موټر او د ترانسپورټ اړوند کاروبارونه په ټپه درېدلي او دواړه خواوې له مهمو اقتصادي فرصتونو بېبرخې شوې دي.
د چمن سوداګرۍ خونې استازو ویلي، چې د یادې لارې د تړلو له امله تراوسه شاوخوا ۲۲۰ مېلیون ډالره اقتصادي زیان اټکل شوی. دوی زیاتوي، چې پاکستان د منځنۍ اسیا له ټرانزیټي سوداګرۍ څخه د ترلاسه کېدونکو بهرنيو اسعارو په برخه کې د پام وړ کموالی تجربه کړی دی.
د راپور له مخې؛ افغانستان ته د پاکستان د صادراتو کچه هم د پام وړ راټیټه شوې ده. سوداګر وايي، د لارو تړل پاتې کېدو تر ټولو ډېر د کرنې سکتور اغېزمن کړی؛ ځکه د دواړه خواوو بزګران نهدي توانېدلي، چې خپل محصولات دودیزو بازارونو ته ورسوي.
د دوی په خبره؛ د مېوو او سبزیجاتو سلګونه زره ټنه حاصلات یا په ټیټه بیه پلورل شوي او یا هم لهمنځه تللي، چې له امله یې بزګرانو ته درانه مالي زیانونه اوښتي دي. سوداګر او د سوداګرۍ خونې استازي له دواړه خواوو غوښتي، چې د چمن ـ سپین بولدک ستونزه ژر تر ژره حل او د سوداګرۍ او تګراتګ عادي بهیر بېرته فعال کړي.
