د هرات یو اوسېدونکي افغانستان انټرنشنل ته ویلي، مېرمن یې د درملنې لپاره روغتون بېولې وه او کور ته د تګ پرمهال یې طالبان ولیدل چې ښځې یې موټر ته پورته کولې. نوموړی زیاتوي، چې په ډېره وېره یې لاره بدله کړې او له خپلې مېرمنې سره یې کور ته ځان رسولی.
دغه اوسېدونکی وايي: «نن پنجشپه د چنګاښ په ۳مه زه او مېرمن مې ډاکټر ته تللي وو. زما مېرمن د هراتیانو په اصطلاح حجاب او د کابلیانو په اصطلاح چپن اغوستې وه. هغې ویل چې ماښام شوی، ډاکټر هم نږدې دی او طالبان هم نه ښکاري؛ نو ستونزه به نهوي. له بلې خوا باد ډېر و او هغې چادر نماز نه شوای کنټرولولای او اغوستل یې ورته ستونزمن وو».
د هغه په خبره؛ د شپې څه باندې ۸ بجې وې چې په لاره کې یو ماشوم راته وویل، چې مخ ته مه ځئ هلته طالبان دي. نوموړی د سترګو لیدلی حال داسې بیانوي: «له ډاکټر څخه تر راوتلو وروسته موږ په پښو د کور خواته روان وو. شاوخوا د شپې ۸:۲۵ بجې وې، چې په لاره کې یو تنکی ځوان پر بایسکل زموږ خواته راغی او خبرداری یې راکړ، چې مخکې مه ځئ، ځکه د امر بالمعروف مامورین ښځې موټرو ته پورته کوي».
د هرات دغه اوسېدونکی وایي، د مېرمني د ټینګار له امله یې لاره بدله کړه او کور ته په نږدې کېدو یې د طالبانو ډله ولیدله. نوموړی وايي: «کله چې له سړک څخه واوښتو، لا هم تر کوره شاوخوا ۲۰۰ متره واټن پاتې و. هماغه مهال مو ولیدل، چې یو هایلکس، یو هایس او یو رنجر موټر په ډېر ورو سرعت روان وو. د هایس موټر دننه څو ښځې لیدل کېدې او شاوخوا څلور تر شپږو نور کسان هم په هماغه موټر کې سپاره وو».
دغه اوسېدونکي کور ته خپل امن رسېدل نېکمرغي وګڼله او ویې ویل :«له نېکه مرغه موږ پرته له کومې ستونزې خپل کور ته ورسېدو. دا هغه څه وو چې نن شپه مې په خپلو سترګو ولیدل».
