د کرېکټ نړۍوالې شورا په تازه ډلبندۍ کې راشد خان یو وار بیا لومړی مقام خپل کړ
د افغانستان د کرېکټ ستوري راشد خان ارمان په نړۍواله ډلبندۍ کې چې د چهارشنبې په ورځ اعلان شوه، یو وار بیا د نړۍ د غوره توپ اچوونکو په ډله کې لومړی مقام خپل کړ. د یادې ډلبندۍ له مخې؛ راشد خان د یو ورځنیو نړۍوالو لوبو په کټګورۍ کې له ۶۸۲ نمرو سره په لومړي ځای کې دی.
په دغه نوملړ کې د پاکستان ابرار احمد له ۶۷۵ امتیازونو سره دویم او د انګلستان جوفرا ارچر له ۶۴۹ نمرو سره درېیم ځای خپل کړی دی. د شل اوریزو (T20) لوبو د توپ اچوونکو په ډلبندۍ کې بیا راشد خان له ۷۵۳ نمرو سره په لومړي ځای کې پاتې شوی دی.
په یاده ډلبندۍ کې له هند نه ورون چکرورتي له ۷۴۰ نمرو سره په دویم ځای کې او له پاکستان نه ابرار احمد له ۷۳۶ نمرو سره په درېیم ځای کې دی. له دې پایلو سره راشد خان د کرېکټ په دواړو بڼو کې د نړۍ یو له خورا ثابت او غوره توب اچوونکو پاتې شو.
