په جلاوطنۍ کې د افغانستان د خلکو عالي شورا د پخوانیو افغان پوځیانو او کډوالو پر روان وضعیت اندېښنه ښودلې. دغه شورا وایي، چې زرګونه پخواني پوځیان او د هغوی کورنۍ په ګاونډیو هېوادونو په ځانګړې توګه پاکستان کې له سخت بشري ناورین او ناروښانه برخلیک سره مخ دي.
یادې شورا د یوې خبرپاڼې په خپرولو سره له ملګرو ملتونو، د کډوالو له عالي کمېشنرۍ او کوربه هېوادونو غوښتي، چې د افغان کډوالو د جبري اخراج مخه ونیسي او د پخوانیو پوځیانو دوسیو ته ژر تر ژره رسېدنه وکړي.
دغه شورا وایي: «ایا نړۍواله ټولنه به خپل مسوولیت ادا کړي؟ د افغانستان پخواني پوځیان کلونه د ترهګرۍ او افراطیت پر وړاندې د مبارزې په لومړۍ کرښه کې ولاړ وو او د نړۍوالې ټولنې تر څنګ یې د امنیت او ثبات د ټینګښت او له انساني ارزښتونو د دفاع لپاره هڅې کړې دي».
د خبرپاڼې له مخې؛ اوسمهال د دغه پوځیانو ډېری کورنۍ په جلاوطنۍ کې له بېوزلۍ، ناروښانه برخلیک او د اوسېدو اسنادو نشتوالي له امله د جبري اېستلو له ګواښ سره مخ دي.
خبرپاڼه زیاتوي، چې د پخوانیو پوځیانو، د پخواني حکومت د کارکوونکو، مدني فعالانو او د هغوی د کورنیو په زرګونه غړي په ګاونډیو هېوادونو او په ځانګړې توګه پاکستان کې له یو خورا ستونزمن بشري ناورین سره مخ دي.
د یادې شورا په وینا؛ د هغوی ماشومان د زدهکړې له حقه بېبرخې شوي، ناروغان روغتیايي خدمتونو ته لاسرسی نهلري او زرګونه کورنۍ په سختو او ناڅرګندو شرایطو کې ژوند کوي.
په جلاوطنۍ کې د افغانستان د خلکو عالي شورا د پناه غوښتنې د دوسیو په څېړلو کې پر ځنډ، له ګواښ سره د مخ کسانو لپاره د اغېزناک ملاتړ پر نشتوالي او د نړۍوالې ټولنې پر بېغورۍ اندېښنه څرګنده کړې.
یادې شورا له ملګرو ملتونو، د کډوالو له عالي کمېشنرۍ، د کډوالۍ نړۍوال سازمان، د پاکستان له حکومت او د بشري حقونو له ټولو ملاتړو هېوادونو غوښتي، چې د افغان کډوالو د جبري اخراج مخه ونیسي، د پخوانیو پوځیانو او د هغوی د کورنیو دوسیو ته سملاسي رسېدنه وکړي، کډوالو ماشومانو ته د زدهکړو زمینه برابره کړي، بشري او اقتصادي مرستې زیاتې کړي او خپل اخلاقي مسوولیتونه ادا کړي.
دوی وایي، د دغه بشري ناورین پر وړاندې چوپتیا د هغو ارزښتونو اعتبار تر پوښتنې لاندې راولي چې نړۍوالې ټولنې کلونه، کلونه ترې دفاع کړې ده. یادې شورا په پای کې ویلي: «له ټولو نړۍوالو بنسټونو، حکومتونو او د بشري حقونو له ملاتړو سازمانونو غواړو، چې د زرګونه افغان کډوالو او پخوانیو پوځیانو د کړاو پر وړاندې چوپ پاتې نهشي او بېړني ګامونه پورته کړي».
