د امریکا سترې محکمې د پناه غوښتنې په قضیه کې د ټرمپ د حکومت په ګټه پرېکړه کړې
د امریکا سترې محکمې د کډوالو په تړاو د ټرمپ ادارې په ملاتړ پرېکړه وکړه. ددې پرېکړې له مخې چارواکي کولای شي پناه غوښتونکي هغه مهال له پولې شاته کړي چې د امریکا د سترې محکمې چارواکي دا وګڼي چې د متحده ایالاتو او مکسیکو ترمنځ سرحدي تګ راتګ د نوو پناه غوښتنو د ثبت وړتیا نه لري.
محکمې د رایو په اکثریت، چې د محافظهکارو قاضیانو له خوا یې ملاتړ کېده، د یوې ټیټپوړې محکمې هغه پرېکړه لغوه کړه چې دا پالیسي یې د فدرالي قانون خلاف بللې وه.
د ټرمپ ادارې ویلي چې ښايي دا پالیسي چې میټرینګ بلل کېږي، بېرته فعاله کړي.
دا پالیسي د ټرمپ د لومړۍ دورې پر مهال عملي شوې وه او وروسته د ولسمشر جو بایډن ادارې له خوا لغوه شوې وه.
ددې پالیسي له مخې د امریکا د کډوالۍ چارواکو ته اجازه ورکول کېده چې د سرحد په اوږدو کې پناه غوښتونکي ودروي او د هغوی د غوښتنو د ثبت بهیر تر نامعلومې مودې وځنډوي.
د قانون له مخې، هغه کډوال چې د امریکا خاورې ته رسيږي د پناه غوښتنې حق لري او باید د کډوالۍ له فدرالي چارواکو سره د ارزونې له بهیره تېر شي.
