په نړۍوالو بازارونو کې د تېلو بیې نورې هم ټیټې شوې
د پنجشنبې په ورځ په نړۍوالو بازارونو کې د تېلو بیې وروسته له هغې ټیټې شوې، چې بند پاتې ټانکرونه له هرمز تنګي ووتل او د انرژۍ په برخه کې اندېښنې راکمې شوې. د برنېټ خامو تېلو بیه ۰.۵ سلنه راټیټه شوه او په یو بېرل کې ۷۳.۳۴ ډالرو ته ورسېده، چې تر جګړې دمخه کچې ته نږدې شوه.
له دې سره د لوېدیځ ټېکساس انټرمیډیټ خامو تېلو بیه ۰.۳۸ سلنه راټیټه شوه او په یو بېرل کې ۷۰ ډالرو او ۷ سنټو ته ورسېده. شنونکي په دې باور دي، چې د تېلو د بیو دغه کمښت په منځني ختیځ کې د جیوپولیتیک کړکېچونو د کمښت او د ایران او امریکا ترمنځ تر احتمالي تړونونو وروسته د هرمز تنګي له لارې د تېل وړونکو کښتیو د تګراتګ بیا پیل له امله دی.
په ځینو غیر اوپیک هېوادونو او په ځانګړې توګه په چین کې د تولید زیاتوالي او د کمزورې نړۍوالې تقاضا په اړه اندېښنې د یادې لړۍ پر پیکه کېدو اغېز کړی. ځینې شنونکي په دې باور دي، چې د بیو اوسنۍ کچه (د برنېټ لپاره تر ۸۰ ډالرو ښکته) کولی شي د پېرودونکو لپاره ښه ملاتړ چمتو کړي او د چټک کمښت مخه ونیسي.
په نړۍواله کچه د تېلو ټیټه بیه د واردوونکو هېوادونو لکه هند، ترکیې او ګڼو اروپایي هېوادونو لپاره ښه زېری دی، چې د انرژۍ لګښتونه یې کم شوي. خو د سعودي عربستان، روسیې او اوپیک غړو هېوادونو په ګډون د هغو اقتصادونو لپاره چې د تېلو صادراتو پورې تړلي دي؛ دغه لړۍ کولی شي د حکومت په بودجې فشار زیات کړي او د دوی پراختیایي پلانونه اغېزمن کړي.
د تېلو بازار په راتلونکو ورځو کې د امریکا د زېرمو او د اوپیک پلس احتمالي پرېکړو په اړه اوونیزو راپورونو ته سترګې په لار دی.
