د ټيټيپي خبرداری؛ په سند ایالت کې تازه ګمارل کېدونکي پوځیان به زموږ د بریدونو موخه وي
د پاکستاني طالبانو تحریک (ټي ټي پي) وایي چې په سند ایالت کې د پوځ له لوري د ځوانانو د نوي جذب بهیر د دوی په وینا «د بې وسه ولس د قربانۍ» هڅه ده او خبرداری یې ورکړی چې په تازه ګمارل کېدونکو کسانو به بریدونه وکړي.
د ټي ټي پي ویاند محمد خراساني په یوه اعلامیه کې چې نن خپره شوې، ویلي چې د رسنیو له لارې یې معلومات ترلاسه کړي چې د سند ایالت په عمرکوټ، میرپورخاص او تهرپارکر سیمو کې د منځني زدهکړو، د لوړو ثانوي زدهکړو، منځنۍ زدهکړې، ابتدايي زدهکړې او حتی بېسواده ځوانانو د پوځ لپاره د جذب اعلان شوی دی.
په اعلامیه کې ادعا شوې چې پخواني پوځیان، په ځانګړي ډول د پنجاب اړوند، قبایلي سیمو ته له تګ ډډه کوي او د ټي ټي پي په وینا د دوی له امله تلفات ویني، نو ځکه اوس د سند «بې وسه ولس» د پوځ په لیکو کې جذب کېږي.
خراساني په اعلامیه کې دا هم ویلي چې د سند خلک د اوږدې مودې راهیسې د فدرالي حکومت له خوا له حقونو محروم شوي او د ده په وینا اوس یو ځل بیا د قربانۍ په توګه کارول کېږي.
په اعلامیه کې وړاندې راغلي چې ټي ټي پي د پخوانیو کارکوونکو لپاره ورکړل شوې مهلت موده پای ته رسېدلې او هغوی ته سپارښتنه شوې چې خپلې دندې پرېږدي او «حلال رزق» لپاره بل لاره غوره کړي.
دغه ډلې په څرګنده خبرداری ورکړی چې نوي ګمارل شوي کسان به د دوی د هدف لاندې وي او له هغوی یې غوښتي چې د پوځ سره له همکارۍ ډډه وکړي.
د پاکستان حکومت تر اوسه د ټي ټي پي ددغه ګواښ په اړه رسنیو ته څه ندي ویلي.
