په وېنزویلا کې دوو زورورو زلزلو زرګونو کسانو ته مرګژوبله اړولې ده
د وېنزویلا چارواکو ویلي چې د دغه هېواد د پلازمېنې کاراکاس په شاوخوا سیمو کې د دوو پرلهپسې او ویجاړونکو زلزلو له امله د زرګونو کسانو د مړینې وېره شته. دغو زلزلو ګڼې ودانۍ نړولې، خلک یې تر خاورو لاندې کړي او په هېواد کې یې بېړنی حالت رامنځته کړی دی.
د وینزویلا سرپرستې ولسمشرې ډیلسي روډریګز په ټلوېزیوني وینا کې تایید کړه چې تر اوسه د ۱۶۴ کسانو مړینه په رسمي توګه ثبت شوې ده، خو په دغو ارقامو کې د لا ګوایرا ایالت تلفات نه دي شامل چې تر ټولو زیات ځپلو شوی دی. هغې وویل: «په لسګونو ودانۍ نړېدلې او زموږ ژغورونکي ټیمونه په شدت سره کار کوي. لا ګوایرا ایالت په یو ریښتیني ناورین بدل شوی دی».
ورته مهال، د امریکا جیولوژیکي سروې ادارې اټکل کړی چې د مړو شویو کسانو شمېر ښايي له ۱۰ زرو څخه هم واوړي.
دا زلزلې په داسې حال کې وشوې چې په دغه هېواد کې عمومي رخصتي وه او ډېری خلک په خپلو کورونو کې وو. د وینزویلا د پارلمان پخواني غړي ویلمر ازواجي د مایکیټیا د نړیوال هوایی ډګر د نړېدو ویډیو خپره کړې چې پکې چتونه او دېوالونه راغورځېږي. د دغه هوایي ډګر تړل کېدو د بهرنیو مرستو رسول ستونزمن کړي دي. خلک وايي دا زلزله د ۱۹۶۷ کال له هغې زلزلې خورا مرګونې او سخته وه چې کاراکاس یې لړزولی و. د دغه هېواد اپوزیسیون ډلو په اېکس پاڼه کې د لادرکه شویو کسانو د موندلو لپاره یو وېبپاڼه جوړه کړې چې لا دمخه پکې د ۱۰ زرو څخه د زیاتو لادرکه کسانو نومونه ثبت شوي دي.
