د بېپولې داکټرانو سازمان خبرداری ورکړی چې د افغانستان په سویل کې د سختې او خطرناکې خوارځواکۍ له امله د بستر کېدونکو ماشومانو په شمېر کې د اندېښنې وړ زیاتوالی راغلی. دغې ادارې د نړۍوالو مرستو کمښت، وچکالي او د لارو تړل کېدل د دغه بشري ناورین اصلي لاملونه بللي دي.
د بېپولې ډاکټرانو په راپو کې رراغلي چې د ۲۰۲۶ کال له جنوري تر اپریل میاشتې پورې په هلمند او کندهار کې د دوی په روغتیايي مرکزونو کې د سختې خوارځواکۍ لرونکو ماشومانو په بستر کېدو کې د تېرو درېیو کلونو د همدې مودې په پرتله ۳۰ سلنه زیاتوالی راغلی.
د سختې خوارځواکۍ په ناروغۍ د اخته ماشومانو عمر تر یوه کال کم ښودل شوی .
یادې ادارې ویلي، د هلمند په بست ولایتي روغتون کې د روان کال په لومړیو ۴ میاشتو کې له ۱۵۰۰ څخه ډېر ماشومان چې په سختې خوارځواکۍ او نورو نورغیو اخته وو، بستر شوي، چې دا کچه د ۲۰۲۲ کال د همدې مودې په پرتله دوه برابره زیاته ده.
د یادې ادارې په راپور کې راغلي چې په کندهار کې هم په همدې موده کې ۵۷۰ ماشومان بستر شوي او له ۳۰۰ زیات نور ماشومان د ځای د نشتوالي له امله نورو روغتیايي مرکزونو ته ورپېژندل شوي دي.
په سویل کې د بېپولې ډاکټرانو د روغتیايي برخې همغږې کوونکې انا لیلیا وايي:«ماشومان موږ ته په داسې حال کې راوړل کېږي چې ډېر ځنډېدلي وي او وضعیت یې د اندېښنې وړ وي. دا نه یوازې د خوړو د خوندیتوب خرابوالی ښيي، بلکې د خوارځواکۍ د لومړني تشخیص او درملنې د سیسټم د پاشل کېدو مانا هم لري. کله چې میندې پخپله د خوړلو لپاره څه نه لري، نو له هغوی څنګه تمه کېدای شي چې خپلو ماشومانو ته شیدې ورکړي؟».
یادې ادارې ویلي، پرلهپسې وچکالۍ، د نړۍوالو مرستو کمښت د لارو بندښت هغه لاملونه دي چې په کندهار او هلمند ولایتونو کې یې په سختې خواځواکۍ د اخته ماشومانو شمېر ډېر کړی دی.
دوی خبرداری ورکړی چې که نړۍوال مرستندویان په بېړنۍ توګه د افغانستان د خوارځواکۍ له پروګرامونو سره خپلې مرستې بېرته پیل نه کړي، ښايي دا کړکېچ نور هم ژور شي او د ګڼو ماشومانو ژوند به له خطر سره مخ شي.
