زېلېنسکي: اوکراین د روسیې له زندان څخه خپل ۱۶۰ پوځیان ازاد کړل
د اوکراین ولسمشر ولادیمیر زېلېنسکي خبر ورکړی چې هېواد یې وکولای شول ۱۶۰ اوکرایني پوځیان د روسیې له اسارت او بند څخه بېرته هېواد ته ستانه کړي. نوموړي ویلی یاد اوکرایني پوځیان د ۲۰۲۲ کال راهیسې په روسیه کې بندیان وو.
د اوکراین ولسمشر د دغو پوځیانو بېرته راستنېدل د کیېف لپاره یوه لویه بریا بللې او د هغوی د خلاصون لپاره یې د اړوندو ادارو د هڅو مننه کړې ده، خو تر اوسه د دغو بندیانو د تبادلې د شرایطو په اړه نور جزییات نه دي په ډاګه شوي.
روسیه او اوکراین د ۲۰۲۲ کال د فبرورۍ له جګړې راهیسې څو ځله د بندیانو تبادله کړې . دواړه لوري وخت ناوخت د منځګړو په مرسته د پوځي بندیانو د تبادلې اعلان کوي، خو د جګړې له دوام سره لا هم زرګونه کسان د دواړو خواوو په بند کې پاتې دي.
