د افغانستان د کانونو او پټرولیم پخوانۍ وزیرې نرګس نهان، د برېټانیا له پاچا چارلز څخه مننه کړې چې د افغان ښځينه کرېکټ جلاوطنه لوبډلې سره یې ليدلي او ملاتړ یې کوي. هغې ویلي، دا کتنه یو ځل بیا دا روښانه کوي چې «افغانان د افغانستان اصلي استازي» دي.
نهان په اېکس خواله رسنۍ وويل: «د پاچا چارلز څخه ډېره مننه چې زموږ جلاوطنه شوې د افغان ښځو د کرکټ ملي لوبډلې ته یې د کتنې ویاړ ورکړ».
هغې زياته کړه، دغو ځوانو لوبغاړو کلونه کلونه مبارزه وکړه ترڅو وکولای شي د جلاوطنه لوبغاړو په توګه لوبه وکړي. دا کتنه یو ځل بیا دا روښانه کوي چې «افغانان د افغانستان اصلي استازي دي».
همداراز هغې وويل، په «افغانستان کې د جنسیتي اپارټایډ د جرم پېژندنې لپاره زموږ هڅې نه یوازې زموږ لپاره دي، بلکې د دې لپاره دي چې د نړۍ په هېڅ برخه کې هېڅ ښځه یوازې د خپل جنسیت له امله له داسې بېبشرۍ سره مخ نهشي».
د يادونې وړ ده چې د بریتانیا پاچا چارلز درېیم د چارشنبې په ورځ د لندن په کلارنس هاوس کې د افغان کډوالو د ښځینه کرېکټ ټیم له غړو سره وکتل. په دې لیدنه کې پاچا د افغان نجونو هرکلی وکړ او له هغوی سره یې ډلهییز انځورونه واخیستل.
