ایرانی چارواکی: له ۶۰ ورځو وروسته به د هُرمز تنګي له لارې له تېرېدونکو بېړیو محصول اخلو
د ایران د اسلامي جمهوریت د مرکچي پلاوي اقتصادي غړي، حسین قربانزاده ویلي چې د هُرمز تنګي له لارې له تېرېدونکو بېړیو څخه د محصول اخیستل د هوکړې د عملي کېدو لپاره د ۶۰ ورځو لپاره ځنډول شوي، خو له دې مودې وروسته به دغه لړۍ بېرته پیل شي.
هغه وویل، ایران د دې لپاره چې هوکړه عملي شي، د ۶۰ ورځو لپاره د محصول اخیستل ځنډولي، خو د ټاکل شوې مودې له پای ته رسېدو وروسته به له تېرېدونکو بېړیو څخه د خدماتو فیس یو ځل بیا واخیستل شي.
قربانزاده ټینګار وکړ چې یوازې د یوې طبیعي سمندري لارې څخه د بېړیو د تېرېدو په بدل کې د فیس اخیستل د نړیوالو قوانینو له مخې مشروع نه دي او لګښتونه یوازې هغه مهال اخیستل کېږي چې بېړیو ته ځانګړي خدمات وړاندې شي.
هغه همداراز وویل، د هرمز تنګي د سمندري تګلارې او تېرېدو د مقرراتو په ټاکلو کې ایران او عمان، د ساحلي هېوادونو په توګه، د ویټو حق لري او د همدې تنګي د حقوقي نظام په ټاکلو کې اساسي رول لوبوي.
