د اسراییل د دفاع وزیر یسراییل کاتز ویلي چې که ایران پر اسراییل برید وکړي، نو خپله به تر ټولو ستره تېروتنه ترسره کړي. هغه ایران ته خبرداری ورکړی چې ځواکونه یې چمتو دي، څو کار پای ته ورسوي.
کاتز د جمعې په ورځ پر اېکس پاڼه د سپاه پاسداران د قدس ځواک د قوماندان اسماعیل قااني وروستیو څرګندونو ته په غبرګون کې ولیکل: «که د ایران اسلامي جمهوریت پر اسراییل برید وکړي، خپله به تر ټولو ستره تېروتنه وکړي».
هغه د قااني په اړه ویلي: «داسې ښکاري چې د جاسوس او خاین رول له دغو مسخره ګواښونو سره تر دې ډېر ورته مناسب دي».
د اسراییل د دفاع وزیر زیاته کړه: «نه به هرمز د دوی مرسته وکړي او نه هم پر ملکي وګړو بریدونه. هېڅ شی به زموږ مخه ونه نیسي. زموږ ځواکونه چمتو دي چې کار تر پایه ورسوي».
د سویلي کوریا د دفاع وزارت وایي، هېواد یې د شمالي کوریا د ګواښونو د مخنیوي لپاره ۵۰۰ زره سرتېرو ته د ډرون روزنه ورکوي. د سویلي کوریا چارواکو ویلي، د ډرون او ډرون ضد وړتیاوې به پراخې کړي او لسګونه زره بې پیلوټه سیسټمونه به د لومړۍ کرښې پوځي واحدونو ته وسپاري.
د سوېلي کوریا د دفاع وزیر اهن ګیوبک وویل، پوځ یې په پام کې لري چې تر ۲۰۲۹ کال پورې ډرونونه تولید او د ځمکني، سمندري، هوايي او پلي ځواکونو په واک کې ورکړي. د سویلي کوریا د وزارت د نوې پرېکړې له مخې، شاوخوا ۶۰ زره ډرونونه به تولید شي چې ۱۱ زره به یې سمدستي په ۲۰۲۶ کال کې پوځ ته وسپارل شي.
د سویلي کوریا د دفاع وزیر په یوه خبرې ناسته کې وویل:«ډرونونه باید نور یوازې د محدودو پوځي واحدونو تجهیزات نه وي، باید د جګړې یوه عامه وسیله شي. سرتېري باید له ډرونونو څخه د دویمې شخصي وسلې په توګه کار واخلي».
نوموړي زیاته کړې چې دغه ډرونونه به د پوځ په ټولو څانګو کې ووېشل شي، څو د هر سرتېري د معیاري تجهیزاتو برخه وګرځي. د سویلي کوریا د دفاع وزیر ویلي، د نویو پرمختللو تجهیزاتو په جوړولو کې یوازې پر کورنیو تولیداتو او پرزو تکیه کوي.
دا اعلان په داسې حال کې کېږي چې دواړه کوریاوې، د اوکراین او منځني ختیځ د جګړو له تجربو وروسته، د خپلو ډرون وړتیاوو د پراخولو هڅې چټکې کړې دي.
د سوېلي کوریا په پلان کې د لېزري او لوړ ځواک مایکرووېف وسلو په ګډون د ډرون ضد سیسټمونو پراخول هم شامل دي. همداراز د دغه هېواد پوځ غواړي د مصنوعي ځیرکتیا پر بنسټ د ډله ییزو ډرونونو سیسټمونه او له ۲۰ زرو څخه ډېر ارزانه، یو ځل کارېدونکي ډرونونه هم ترلاسه کړي.
دا پراختیا په داسې وخت کې اعلانېږي چې د سوېلي کوریا پخوانی ولسمشر یون سوک یول د شمالي کوریا خاورې ته د پوځي ډرون د ننوتلو د قضیې په تړاو د محکمې له پرېکړې وروسته له سیاسي فشارونو سره مخ شوی، او د اوسني ولسمشر لي جې میونګ حکومت د ډرون د عملیاتو پخوانۍ قومانده منحل کړې ده.
د نیویارک ښاروال زهران ممداني د عاشورا په مراسمو کې ګډون کړی او د محرم میاشتې د لسمې ورځې په مناسبت یې په یوه پیغام کې د عدالت، انساني کرامت او د ظلم پر وړاندې د مبارزې پر ارزښتونو ټینګار کړی دی.
ممداني عاشورا د امام حسین د میراث د یادونې او د نیویارک په مذهبي او فرهنګي توګه متنوع ټولنه کې د ګډ ژوند او ګډو انساني ارزښتونو د تامل یوه مهمه موقع بللې ده.
په ټولنیزو رسنیو کې خپاره شوي انځورونه ښيي چې ممداني د عاشورا په مراسمو کې ګډون کړی دی.د نیویارک ښاروال په خپل پیغام کې ویلي، د ښار ځواک له هغو بېلابېلو مذهبي دودونو سرچینه اخلي چې د نیویارک هویت یې جوړ کړی. هغه زیاته کړې: «عاشورا د یاد، قربانۍ او تامل وخت دی. نن د محرم په لسمه د امام حسین نه ماتېدونکې ژمنتیا د حقیقت او انساني کرامت پر وړاندې یادوو. د هغه تلپاتې میراث موږ ته د ایمان، یو بل ته د خدمت او د دې باور ارزښت را په یادوي چې عدالت تل د مبارزې ارزښت لري».
هغه په پای کې زیاته کړې: «هیله لرم، داسې مهال چې د نیویارک د ټولو اوسېدونکو لپاره د لا عادلانه ښار د جوړولو هڅه کوو، دا ارزښتونه هم له ځان سره وساتو».
د تهران د جمعې موقت امام محمدجواد علي اکبري ویلي، که له امریکا سره د سیمه ییزو او نړیوالو ملاحظاتو له مخې کومه هوکړه وشي، هغه به ستراتیژیکه نه، بلکې موقتي وي. نوموړي امریکا او اسراییل د یوې سکې دوه مخونه بللي او ټینګار یې کړی چې ایران د امریکا پر ژمنو او هوکړو هېڅ باور نه لري.
ایراني رسنیو دجواد علي اکبري له قوله ویلي، که د سیمه ییزو او نړیوالو ملاحظاتو او د ځینو ګاونډیو هېوادونو د درناوي له امله له امریکا سره کومه هوکړه لاسلیک شي، دا به د «ستراتیژیکې هوکړې» په معنا نه وي، بلکې یوازې به یوه «موقتي هوکړه» وي.
هغه زیاته کړې، ایران د امریکا د بېلابېلو حکومتونو ترمنځ هېڅ توپیر نه کوي.
علي اکبري متحده ایالات او اسراییل «د یوې سکې دوه مخونه» بللي او زیاته کړې یې ده چې «د ایران ملت» لا هم ځان د علي خامنهیي او د هغه په وینا د «د حق لارې» د نورو وژل شویو کسانو د وینې غچ اخیستونکی ګڼي. د تهران د جمعې موقت امام ویلي، ایران د امریکا پر ژمنو او هوکړو هېڅ باور نه لري.
د ایران د بهرنیو چارو وزارت د امریکا او د خلیج د همکارۍ شورا په وروستۍ ګډه اعلامیه کې د ایران په اړه څرګند شوي دریځونه رد کړي او هغه یې «لاسوهنه، غیرمسوولانه او پاروونکې» بللي دي.
د ایران د بهرنیو چارو وزارت په اعلامیه کې راغلي چې د خلیج د همکارۍ شورا د غړو هېوادونو د امنیت په اړه د امریکا ادعاوې د حقیقت تحریف دی. تهران وایي، د امریکا پوځي حضور په سیمه کې د امنیت د ټینګښت پر ځای د ناامنۍ، بېثباتۍ او وېش لامل شوی دی.
ایران ویلي، د ۲۰۲۶ کال د فبرورۍ له ۲۸مې څخه د اپرېل تر ۸مې پورې د سیمې له ځینو هېوادونو څخه د امریکا د پوځي اډو په کارولو سره پر ایران بریدونه دا ښيي چې واشنګټن د سیمې امنیت او د هېوادونو دوه اړخیزو اړیکو ته ارزښت نه ورکوي.
د ایران د بهرنیو چارو وزارت له هغو سیمهییزو هېوادونو هم غوښتي چې د امریکا او اسراییل د وروستیو بریدونو پر مهال یې خاوره او پوځي تاسیسات د عملیاتو لپاره کارول شوي، خپل امنیتي دریځونه له سره وارزوي. تهران ټینګار کړی چې د نړیوالو قوانینو او د ښه ګاونډیتوب د اصل له مخې، هېڅ هېواد باید خپله خاوره د بل هېواد پر ضد د پوځي برید لپاره ونه کاروي.
اعلامیه د ایران د سولهییز اټومي پروګرام په اړه د امریکا او اسراییل ادعاوې هم ردوي او د خلیج د همکارۍ شورا له غړو هېوادونو غواړي چې د «ایران ګواښ» له روایت سره د یوځای کېدو پر ځای، له ایران سره د اټومي وسلو څخه د لوېدیځې اسیا د پاکې سیمې د نوښت ملاتړ وکړي.
د ایران د بهرنیو چارو وزارت د فلسطین او لبنان د مقاومت ډلو ته د «ایران نیابتي ډلې» د نوم ورکولو مخالفت هم کړی او ویلي یې دي چې په سیمه کې یوازینی نیابتي جوړښت اسراییلي رژیم دی.
د اعلامیې په پای کې، ایران د هرمز تنګي د ناامنۍ مسوولیت امریکا، اسراییل او هغو سیمهییزو هېوادونو ته ور اړولی چې د وروستیو بریدونو ملاتړ یې کړی و او ټینګار یې کړی چې په سیمه کې تلپاتې امنیت یوازې د سیمهییزو هېوادونو ترمنځ د همکارۍ او د بهرنیو لاسوهنو له پای ته رسېدو سره ممکن دی.
د اسټرالیا حکومت ویلي، د ۱۶ کلونو څخه د کم عمره ماشومانو او نویو ځوانانو لپاره به د ټولنیزو رسنیو د بندیز د پلي کېدو قوانین لا پیاوړي کړي او د سرغړوونکو ټکنالوژۍ شرکتونو پر ضد به قانوني اقدام وکړي.
د اسټرالیا لومړي وزیر انتوني البانیز ویلي، حکومت غواړي ډاډ ترلاسه کړي چې قوانین د هر ډول قانوني ننګونو پر وړاندې پیاوړي شي او د هېواد د انټرنېټ د خوندیتوب ادارې ته به د قانون د اغېزمن پلي کېدو لپاره نور واکونه هم ورکړل شي.
دغه بندیز شپږ میاشتې مخکې نافذ شوی او د ټولنیزو رسنیو پلاتفورمونه د ۱۶ کلونو څخه د کم عمره کسانو لپاره د حسابونو له جوړولو منع کوي.
که کوم پلاتفورم په سیسټماټیک ډول د قانون له پلي کولو سرغړونه وکړي، تر ۴۹،۵ میلیونه اسټرالیايي ډالرو پورې به جریمه شي.
تازه څېړنې ښيي چې د عمر د تایید اوسني میکانیزمونه اغېزناک نه دي او ډېری تنکي ځوانان لا هم د خپل عمر په ناسم ثبتولو یا د ځان انځور په کارولو بندیز تېروي.
په همدې حال کې، د انټرنېټي بحثونو وېبپاڼې «رېډېټ» د بیان د ازادۍ په دلیل د اسټرالیا سترې محکمې ته عریضه کړې، خو حکومت ویلي چې له خپل قانون څخه به دفاع وکړي.
د ځوانانو د روغتیا کارپوهان وایي، که څه هم بندیز تر اوسه د ټولنیزو رسنیو کارونه په بشپړه توګه نه دي راکمه کړې، خو د کورنیو او ټولنې چلند د ماشومانو د انلاین فعالیتونو په اړه د بدلون په حال کې دی.