۲۹کلن افغان پناهغوښتونکی بکتاش سلطاني چې په برېتانیا کې په خپل اپارتمان کې پر دوو ۱۴ کلنو نجونو د جنسي تېري په تور محاکمه کېږي، د چهارشنبې په ورځ یې په محکمه کې شاهدي ورکړه.
هغه وويل، چې د طالبانو له منګولو څخه د تېښتې دمخه يې اووه کاله په افغانستان کې د برتانوي پوځ لپاره کار کړی دی. د قضیې د څارنوالانو په وینا؛ د تېرکال په ډسمبر میاشت کې د پېښې پرمهال دواړه نجونې ۱۴ کلنې وې.
د څارنوالانو په وینا؛ نجونې د الکول څښلو له امله هغه مهال «کله په هوش او کله ناکله د بېهوشۍ» په حال کې وې او تورن د دوی له حالت څخه ګټه پورته کړه؛ ترڅو جنسي تېری پرې وکړي. ویل شوي، چې بکتاش سلطاني تر دې وړاندې په خپل اپارتمان کې نجونو ته «ووډکا» ورکړې وه.
خو تورن چې په محکمه کې یې د ژباړونکي په مرسته شاهدي ورکړه، دغه تورونه رد کړل او ویې ویل، چې د پېښې پرمهال یې «د نه کنټرولېدونکي خوب» احساس کاوه او د یو څه وخت لپاره ویده شو.
د هغه مدافع وکیل د دغه پوښتنې په ځواب کې چې ایا چا ورسره څه کړي دي یا هغه کولی شي ووایي، چې نجونو هغه مهال څه کول وویل چې هغه په بشپړ ډول په هوش کې نهو؛ نو هغه نهشي کولی پهدې اړه څه ووایي.
بکتاش سلطاني وړاندې محکمې ته ویلي و، چې په ۲۰۲۲کال کې واک ته د طالبانو له رسېدو وروسته هغه د پناه غوښتونکي په توګه برېتانیا ته ولاړ. هغه وويل، چې برېتانيا ته تر راتګ وړاندې يې اووه کاله د افغانستان په بېلابېلو ولايتونو کې له برتانوي پوځ سره کار کړی او له همدې امله اړ شو چې خپل هېواد پرېږدي.
هغه زیاته کړه، چې پخوا له خپلې مور او خویندو سره په یوه هوټل کې اوسېده. د خپل ځان د دفاع په یوه بله برخه کې تورن وویل، چې تر پېښې شاوخوا درې میاشتې دمخه یې د دغه نجونو له ډلې له یوې سره د رستورانت بهر ولیدل او نجلۍ ورته ویلي و چې ۱۸ کلنه ده. د بکتاش سلطاني په وینا؛ دوی وروسته په سنپ چټ خواله رسنۍ کې په اړیکه کې وو.
هغه د پېښې د ورځې په اړه وویل، چې د نجلۍ له پرلهپسې پیغامونو او په سنپ چټ کې تر زنګ وروسته یې ومنله، چې له هغې او بلې نجلۍ سره وګوري. هغه ټینګار وکړ، تر یادې پېښې یې فکر کاوه چې نجونې ۱۸ یا ۱۹ کلنې دي.
