پاکستاني امنیتي ځواکونه د بنو په عملیاتو کې د اووه وسلهوالو د وژلو ادعا کوي
پاکستاني امنیتي ځواکونو ادعا کړې، چې د پښتونخوا په بنو ولسوالۍ کې یې د عملیاتو پر مهال لږ تر لږه ۷ وسله وال وژلي دي. دا ادعا داسې مهال کېږي چې نن د بنو په خوجړي سیمه کې ناپېژاندو وسلهوالو د یوې سیمهییزې خیریه موسسې پر امبولانس ډزې کړي، چې له امله یې څلور کسان وژل شوي دي.
د پاکستاني رسنۍ «ډان» د خبر له مخې، امنيتي سرچينو ادعا کړې، چې ځواکونو یې د باکا خېل علاقدارۍ په غوړه باکا خېل سیمه کې عملیات ترسره کړي او یو شکمن موټر یې په نښه کړی چې ویل کېږي له وسلو او چاودېدونکو توکو ډک و.
د سرچینو په وینا، ځواکونو ته د وسله والو د شکمن حرکت په اړه د باور وړ معلومات ترلاسه شوي وو دوی د استخباراتي معلوماتو له مخې په چټکۍ سره اقدام وکړ او یاد شکمن موټر یې چې یوه دولتي ښوونځي ته نږدې ولاړ و، د کواډکوپټر په وسیله په نښه کړ.
امنیتي سرچینو زیاته کړې چې چاودنې موټر په بشپړ ډول ویجاړ کړ او لومړني راپورونه ښيي چې په موټر کې سپاره ټول له «اوو څخه تر اتو» پورې وسله وال ځای پر ځای وژل شوي دي، سيمه کلابنده کړل شوې او د لټون عمليات هم پيل کړل شوي دي.
