د طالبانو تر واک د دولتي شرکتونو لوی ریاست وايي، چې د شمال د ډبرو سکرو دولتي شرکت اړوند د شباشک له کانونو څخه هره ورځ له ۲۰۰څخه تر ۳۰۰ټنو پورې لوړ کیفیت لرونکي د ډبرو سکاره را ایستل کیږي.
یاد ریاست زیاتوي، چې د شباشک معدني سیمه د «شاکول، جیحون او قرمقل» کانونو یوه برخه ده.
د یاد شرکت په وینا له دې سیمو استخراج شوي سکاره د ۶۰۰۰ تر ۶۵۰۰ کالوري حرارتي ارزښت لري، چې د لوړ کیفیت لرونکي بلل کېږي.
د دغه شرکت مسولین وایي چې دغه سکاره د قوي حرارت تولید او دوامداره سوځېدو له امله د بازار د اړتیاوو په پوره کولو کې مهم رول لري.
دغه ریاست ټینګار کړی چې د کانونو د استخراج بهیر په منظم ډول روان دی او هڅه کېږي چې د تولید کچه یې نوره هم لوړه شي.
