ایران: امریکا پر موږ په برید کولو سره د تفاهم یادښت تر پښو لاندې کړ
د ایران د بهرنیو چارو وزارت پر دغه هېواد د امریکا برېدونه غندلي او «وحشیانه» بللي دي. ایران دغه بریدونه د واشنګټن او تهران ترمنځ د تفاهم د یادښت نقض ګڼلی دی. تهران خبرداری ورکړی چې د دې وضعیت د ټولو پایلو مسولیت د امریکا او هغو غاړو پر غاړه دی چې په دغو تېريو کې ورسره مرسته کوي.
د ایران د بهرنیو چارو وزارت د یوې اعلامیې په خپرولو سره ویلي، د امریکا په دغو بریدونو کې د ایران په سویل کې د ساحلي څارنې تاسیسات په نښه شوي دي. یاد وزارت زیاته کړې چې دوی په ځواب کې په سیمه کې د امریکايي ځواکونو پورې تړلي اهداف ویشتلي دي، خو دا یې نه ده روښانه کړې چې دغه ځوابي بریدونه په کوم هېواد کې شوي دي. د ایران د بهرنیو چارو وزارت د سیمې هېوادونو ته خبرداری ورکړی چې د «ښه ګاونډيتوب اصل» مراعات کړي او اجازه ورنکړي چې له خاورې یې پر ایران بریدونه وشي.
بل لور ته، د امریکا د مرکزي قومندانۍ (سنتکام) ویلي چې ځواکونو یې د جمعې په ناوخته د چنګاښ ۶مه، په هرمز تنګي کې پر یوې سوداګریزې بېړۍ د تېرې ورځې د برید په ځواب کې، پر ایران «یو ځواکمن ځوابي» برید کړی دی.
هممهاله د ایران سپاه پاسداران ځواکونو ویلي، د بحري ځواکونو له لوري یې د هغه څه په غبرګون کې چې دوی د «امریکا تېری او ژمنو ماتول» بولي، په سیمه کې د امریکا د پوځ پر مرکزونو بریدونه کړي دي.
