بلوچستان کې د پرلهپسې زلزلو له امله ۲۰ کسان ټپیان او تر ۹۰ ډېر کورونه زیانمن شوي
د پاکستان بلوچستان ایالت د موسیٰ خېل ولسوالۍ کې د پرلهپسې زلزلو له امله ۲۰ کسان ټپیان شوي او تر ۹۰ ډېر کورونه زیانمن شوي دي.
د اسلاماباد د زلزلې څار ادارې ویلي، د جمعې په ورځ په سیمه کې د ۵،۰ او ۵،۱ درجې په شدت دوه زلزلې وشوې، چې ټکانونه یې په بارکهان ، کوهلو ولسواليو او شاوخوا سیمو کې هم احساس شول.
ځايي چارواکي وايي، ډېر زیان د موسا خېل ولسوالۍ اړوند د کینګري په چاپ سیمه کې اوښتی، چې پکې د خټو جوړ لسګونه کورونه نړېدلي او یا زیانمن شوي دي. د ټپیانو په ډله کې ښځې او ماشومان هم شامل دي او ټول روغتونونو ته لېږدول شوي دي.
چارواکو د زیانونو د ارزونې او له زیانمنو کورنیو سره د مرستو خبر ورکړی دی.
