افغانستان د ازبکستان د کرکټ ملي لوبډلې کوربهتوب کوي
د افغانستان کرکټ بورډ اعلان کړی چې د ازبکستان د کرکټ ملي لوبډله به د یوې دوستانه شل اوریزې سیالۍ لپاره د جولای په ۱۰مه نېټه د خوست په رحمت ولي مسرور کرکټ لوبغالي کې د افغان ایلېون پر وړاندې ولوبېږي.
د کرکټ بورډ په وینا، دغه لوبه به د شپږیزې کرکټ لیګ د یوولسم پړاو سیالیو په لړ کې د سهار په ۹:۰۰ بجو ترسره شي او په هېواد دننه او بهر به په ژوندۍ بڼه خپره شي.
کرکټ بورډ ویلي، دا سیالي د افغانستان او ازبکستان د کرکټ ادارو ترمنځ د همکارۍ د هغه تړون له مخې ترسره کېږي چې د ۲۰۲۵ کال په ډسمبر میاشت کې لاسلیک شوی و.
د افغانستان کرکټ بورډ اجراییوي رییس نصیب خان ویلي، د افغانستان کرکټ بورډ د ازبکستان په څېر د کرکټ له نويو او مخ پر ودې هېوادونو ملاتړ ته ژمن دی او له دې وړاندې یې هم د ازبکستان لوبغاړو او روزونکو ته د ظرفیت لوړونې او روزنیزو پروګرامونو زمینه برابره کړې ده.
هغه زیاته کړې، د افغانستان او ازبکستان ترمنځ دوستانه اړیکې په وروستیو کلونو کې پراخې شوې دي او هیله لري چې د کرکټ په برخه کې همکاري به د دواړو هېوادونو اړیکې نورې هم پیاوړې کړي.
د افغانستان کرکټ بورډ ویلي، د افغان ایلېون لوبډلې نوملړ به وروسته اعلان شي.
