د امریکا د بریدونو له سیوري لاندې؛ پاکستان او ایران د سولې پر هڅو غږېدلي
د پاکستان بهرنیو چارو وزیر اسحاق ډار او د ایران بهرنیو چارو وزیر عباس عراقچي د سولې او ثبات پر اهمیت ټینګار کړی او د دوه اړخیزو موضوعاتو په اړه یې د نږدې همغږۍ د دوام ژمنه کړې ده. دا په داسې حال کې ده چې د راپورونو له مخې، امریکا د ایران پر ځینو هدفونو تازه هوايي بریدونه کړي.
د پاکستان د بهرنیو چارو وزارت ویلي، اسحاق ډار په دې خبرو کې د سیمې او نړۍ د تلپاتې سولې او ثبات لپاره د پاکستان پر رغنده رول ټینګار کړی او ویلي یې دي چې اسلاماباد به د سولې او ثبات د ټینګښت لپاره خپلو هڅو ته دوام ورکړي.
د خبرپاڼې له مخې، عباس عراقچي د سولې د بهیر د ملاتړ په برخه کې د پاکستان له دوامداره همکارۍ مننه کړې ده. هغه همداراز د ایراني بېړۍ د عملې غړو او کبنیونکو د خوندي او اسانه بېرته ستنېدو لپاره د پاکستان له همکاریو هم مننه کړې ده.
دواړو وزیرانو هوکړه کړې چې د دوه اړخیزو او سیمهییزو موضوعاتو په اړه به خپلې نږدې اړیکې او مشورې دوامداره وساتي.
دا خبرې په داسې حال کې شوي چې د راپورونو له مخې، د امریکا پوځ د جمعې په ورځ د شپږو پوځي الوتکو په کارولو سره د ایران پر څلورو هدفونو هوايي بریدونه کړي دي. ویل کېږي دغه بریدونه د ایران د سواحلو په اوږدو کې، هرمز تنګي ته نږدې سیمو او د قشم په ستراتیژیکه ټاپو کې ترسره شوي دي.
تر اوسه امریکايي چارواکو د بریدونو د پایلو، احتمالي تلفاتو او د هدف ګرځول شویو تاسیساتو په اړه نور جزیات نه دي خپاره کړي او ایراني چارواکو هم د دغو راپورونو په اړه رسمي غبرګون نه دی ښودلی.
دا پرمختګونه په داسې وخت کې رامنځته کېږي چې په وروستیو اوونیو کې د امریکا او ایران ترمنځ کړکېچ یو ځل بیا زیات شوی او د هرمز تنګي شاوخوا امنیتي وضعیت د نړیوالو اندېښنې راپارولې دي.
