په ننګرهار کې د طالبانو د حج او اوقافو ریاست په دغه ولایت کې له ملا امامانو، خطیبانو، دیني عالمانو، قومي مشرانو او له ګذر وکیلانو غوښتي، چې د دغې ډلې د مشر د فرمانونو د عملي کولو لپاره هڅې وکړي. یاد ریاست له دیني عالمانو او امامانو په همدې موخه د ژمنې لاسلیکونه هم اخیستي دي.
د ننګرهار ولایت لپاره د طالبانو د رسنیو دفتر د شنبې په ورځ (د چنګاښ ۶مه) په یوې خبرپاڼه کې ویلي، چې د دغه ولایت د ارشاد، حج او اوقافو ریاست له لوري د جلالاباد ښار په اتو حوزو کې له یادو کسانو سره اصلاحي غونډې ترسره شوې دي.
د خبرپاڼې له مخې، په دغو غونډو کې ګډونوالو ته د اسلامي ارزښتونو د پیاوړتیا، د طالبانو د مشر د فرامینو د عملي کېدو، د لمانځه د اقامې، د ناسمو رواجونو، انساني قاچاق او د کوکنارو او نورو نشهيي توکو د مخنیوي په اړه لازمې سپارښتنې وشوې. دغه راز په غونډو کې د ښځو د شرعي حقونو د تامین په اړه هم خبرې شوې دي.
په دغو غونډو کې پر ګډونوالو غږ شوی، چې یادې سپارښتنې له عامو خلکو سره شریکې کړي او د عملي کېدو لپاره یې جدي هڅې وکړي. د طالبانو سیمه ییزو چارواکو د دغو لارښوونو د پلي کولو او د دغې ډلې د مشر د احکامو د تعقیب په موخه له ملا امامانو، خطیبانو او له ګذر وکیلانو څخه د ژمنتیا لاسلیکونه هم اخیستي دي.
طالبانو تر دې وړاندې هم په بېلابېلو ولایتونو کې د جوماتونو له امامانو او قومي مشرانو غوښتي وو، چې د هغوی د حکومت د تګلارو او په ځانګړې توګه د هبتالله اخوندزاده د فرمانونو د پلي کولو لپاره تبلیغ وکړي او له سرغړونکو سره د حساب کتاب خبرداری یې هم ورکړی وو.
