سناتور جیم بنکس: که تهران د هوکړې ژمنو ته غاړه کېنږدي بمباري به دوام ومومي
د امریکا د سنا جرګې جمهوريپال غړي سناتور جیم بنکس له فاکسنیوز شبکې سره په مرکه کې ویلي، د متحده ایالتونو د ولسمشر ډونالډ ټرمپ هغه تګلاره چې له پوځي فشار سره ډیپلوماسي یوځای کوي، د هُرمز تنګي له وروستیو بریدونو وروسته له تهران سره په چلند کې اغېزناکه تمامه شوې ده.
هغه وویل، که تهران د شوې هوکړې له ژمنو سره سم عمل ونهکړي، متحده ایالات به خپلو بمباریو ته دوام ورکړي.
بنکس زیاته کړه، له ایران سره هره اوږدمهاله هوکړه باید دا تضمین کړي، چې تهران به هېڅکله اټومي وسلې ترلاسه نهکړي او د هُرمز تنګی به د سوداګریزو بېړیو پر مخ پرانیستی وي.
نوموړي همدارنګه د امریکا د جګړې وزارت له لوري د ۸۰ میلیارده ډالرو د اضافي بودجې غوښتنې ملاتړ وکړ او ویې ویل، چې متحده ایالاتو په اوکراین او منځني ختیځ کې د شخړو د مدیریت لپاره د خپلو وسلو او پوځي سرچینو د پام وړ برخه کارولې ده او اوس اړتیا لري چې د خپلو وسلو زېرمې بېرته ورغوي.
