بنو کې په مرمۍ لګېدلو څلورو کسانو مړي د امبولانس دننه موندل شوي
د پاکستان د خیبر پښتونخوا په بنو ولسوالۍ کې پولیسو ویلي، د جمعې په ورځ یې د چین ـ پاکستان اقتصادي دهلېز پر حلقوي سړک د یوه امبولانس له دننه د څلورو کسانو مړي موندلي، چې د مرمۍ نښې پرې لیدل کېږي.
د پولیسو په وینا، لومړنۍ پلټنې ښيي چې ناپېژاندو وسلهوالو د امبولانس پر سپرلیو ډزې کړې او څلور واړه کسان یې وژلي دي. چارواکي اټکل کوي چې برید د پنجشنبې شپې ترسره شوی دی.
پولیسو سیمه کلابنده کړې، شواهد یې راټول کړي او مړي یې د عدلي معایناتو لپاره د بنو ولسوالۍ روغتون ته لېږدولي دي.
چارواکو ویلي، د ناپېژاندو بریدګرو پر ضد یې دوسیه ثبت کړې او د برید د انګېزې د معلومولو لپاره پلټنې روانې دي.
بنو په وروستیو میاشتو کې د ناامنۍ د پرلهپسې پېښو شاهد پاتې شوې ده. تېره اوونۍ هم د بنو د وزیر فرعي سیمې په مارکه بېړه کې په دوو چاودنو کې اووه کسان وژل شوي او درې نور ټپیان شوي وو.
