د طالبانو د ارشاد، حج او اوقافو وزارت اعلان کړی، چې له سعودي عربستان څخه هېواد ته د افغان حاجیانو د راستنېدو بهیر د بشپړېدو په حال کې دی. دغه وزارت ویلي، چې د افغان حاجیانو د لېږدولو دغه لړۍ له پلان سره سم په منظم ډول پر مخ روانه ده او ډېر ژر به پای ته ورسېږي.
دغه وزارت د شنبې په ورځ (د چنګاښ ۶مه) د یوې خبرپاڼې په خپرولو سره ویلي، تر اوسه د اریانا افغان او کاماېر هوايي شرکتونو د ۸۶ الوتنو له لارې په ټولیزه توګه ۲۶ زره او ۸۷۲ افغان حاجیان په خوندي او منظم ډول د هېواد څلورو زونونو کابل، مزارشریف، هرات او کندهار ته لېږدول شوي دي.
په دغو لېږدول شویو کسانو کې ۱۴ زره او ۹۸۹ حاجیان د جدې له هوايي ډګر څخه د ۴۸ الوتنو او ۱۱ زره او ۸۸۳ نور حاجیان د مدینې منورې له هوايي ډګر څخه د ۳۸ الوتنو په وسیله افغانستان ته لېږدول شوي دي.
د طالبانو د ارشاد، حج او اوقافو وزارت زیاته کړې، چې اوسمهال په مدینه منوره کې شاوخوا ۳ زره او ۱۲۸ افغان حاجیان پاتې دي، چې هېواد ته د هغوی د لېږدولو لړۍ هم پیل شوې ده. د طالبانو د دغه وزارت د پلان له مخې، تمه کېږي چې د دغو پاتې حاجیانو د لېږدولو پروسه تر راتلونکې چهارشنبې پورې په بشپړه توګه پای ته ورسېږي.
د افغان حاجیانو د بېرته ستنېدو دغه بهیر د تېرې ذوالحجې میاشتې په ۱۵مه نېټه پیل شوی وو، چې د روان هجري قمري کال د حج د مناسکو له ادا کولو وروسته ترسره کېږي.
د یادونې وړ ده، چې سږکال شاوخوا ۳۰ زره افغان حاجیان د حج مناسکو د ترسره کولو لپاره سعودي عربستان ته تللي وو.
