افغانستان کې د برېتانیا پخوانی سفیر لوري برېسټو وایي، چې لندن باید طالبان په رسمیت ونهپېژني، خو د دې ډلې د لیدلورو د درک کولو لپاره باید ورسره په اړيکه کې وي. هغه له افغانستان انټرنشنل سره په مرکه کې خبرداری ورکړ، چې له زده کړو څخه د ښځو او نجونو محرومول به بنسټیزې پایلې ولري.
د افغانستان لپاره د برېتانیا پخواني سفیر د شنبې په ورځ (د چنګاښ ۶مه) د افغانستان انټرنشنل له خبریالې سمیرا رسا سره له طالبانو سره د برېتانیا د تعامل، د دې ډلې د په رسمیت نه پېژندلو او پر ښځو او نجونو د زده کړو د محدودیتونو د پایلو په اړه مرکه کړې ده.
هغه د دې پوښتنې په ځواب کې چې ایا برېتانیا له طالبانو سره د تعامل اراده لري که نه، روښانه کړه، چې لندن باید طالبان په رسمیت ونه پېژني، خو په ورته وخت کې د دې ډلې د لیدلورو او تګلارو د ښه درک لپاره باید له هغو سره په اړیکه کې پاتې شي.
برېسټو ټینګار وکړ، چې له طالبانو سره تعامل د هغوی له سیاستونو سره د موافقې په معنا نهدی او زیاته یې کړه: «د برېتانیا حکومت له ډېرو داسې کسانو سره کار کړی چې ورسره موافق نه وو. ځینې یې حکومتونه وو او ځینې یې حکومتونه نه وو. موږ له هغو ټولو کارونو سره چې طالبان یې په ځانګړې توګه د ښځو او نجونو پر وړاندې ترسره کوي، موافق نه یو او باید روښانه کړو چې دا اقدامات څه پایلې لري».
دغه پخواني برېتانوي چارواکي همداراز په افغانستان کې د ښځو او نجونو پر زده کړو د بندیز په اړه د اندېښنې په څرګندولو سره وویل، طالبانو په دې کار سره د ټولنې نیمایي کاري ځواک له زده کړو بې برخې کړی دی.
هغه د جنسیتي محدودیتونو پر لرې کولو او د افغان ښځو پر ځواکمنولو د ټینګار په ترڅ کې زیاته کړه: «موږ باید طالبان قانع کړو، که غواړي هېواد اداره کړي، د ټولنې نیمایي برخه له پامه نشي غورځولی».
لوري برېسټو د ۲۰۲۱ کال په مې میاشت کې د الیسن بلیک پر ځای په افغانستان کې د برېتانیا د سفیر په توګه وټاکل شو او د همدې کال د اګسټ په ۲۹مه، پر افغانستان د طالبانو له واکمنۍ لږ وروسته بېرته برېتانیا ته ستون شو.
