په عراق کې د درغلیو ضد عملیاتو کې ۴۷ سیاستوال او چارواکي نیول شوي
د عراق حکومتي ویاند خبر ورکړی چې د دغه هېواد امنیتي ځواکونو د لومړي وزیر علي الزیدي په امر د فساد ضد پراخو عملیاتو په لړ کې د پارلمان د غړو او دولتي چارواکو په ګډون ټولټال ۴۷ شکمن کسان نیولي دي.
د عراق دولتي خبري اژانس (INA) د یوه لوړپوړي چارواکي له قوله ویلي، د نیونو یوه برخه د تېلو وزارت د تصفیې چارو د مرستیال وزیر عدنان الجمیلي له څرګندونو وروسته شوې، چې تر نیول کېدو وروسته یې د نورو چارواکو نومونه هم یاد کړي دي.
د عراق دحقوقي او امنیتي سرچینو په وینا، د عراق د ترهګرۍ ضد ځانګړو ځواکونو د بغداد په سخته امنیتي «شنه سیمه» کې د شپې له خوا پر کورونو چاپې وهلې او یو شمېر شکمن کسان یې نیولي دي.
د سرچینو په وینا، دغه عملیات د لومړي وزیر علي الزیدي په مستقیم امر وروسته له هغه پیل شول چې قضايي ادارو د شکمنو شبکو د غړو د نیولو حکمونه صادر کړل.
د عراق دحکومت ویاند حیدر العبودي ویلي، نیونې لا هم روانې دي.
د سرچینو په وینا، د نیول شویو کسانو په ډله کې د تېلو وزارت د وېش چارو مرستیال وزیر علي معارج هم شامل دی.
