د ګډو ګټو خپلواکو هېوادونو ټولنې (سي اي ايس ) سرمنشي، سرګي لیبیدیف، ویلي چې د افغانستان د منزوي کولو تګلاره اغېزناکه نه ده او د دغه هېواد فعال ګډون په سیمهییزو اقتصادي، ټرانزیټي او امنیتي پروژو کې د اوراسیا د دوامدار ثبات لپاره اړین دی.
هغه د «پریمکوف لوستنې» په نوم د ۱۲مې علمي او تخصصي غونډې پر مهال وویل، د دې سازمان غړو هېوادونو د افغانستان په اړه عملي او واقعبینانه دریځ غوره کړی او له واکمنو طالبانو سره یې د اقتصادي، ټرانزیټي او امنیتي همکاریو لپاره دوامدارې اړیکې ساتلې دي.
د هغه په وینا، د دغو همکاریو پراختیا کولی شي د سیمې ګډ امنیت پیاوړی او اقتصادي اړیکې پراخې کړي.
لیبیدیف همداراز له طالبانو وغوښتل چې د داعش پر ضد خپلې مبارزې او د افغانستان د امنیت د ټینګښت هڅې جاري وساتي او ویې ویل، دا اقدامات د سیمې د هېوادونو د ګډ امنیت لپاره مهم دي.
د نوموړي څرګندونې په داسې حال کې دي چې په وروستیو میاشتو کې د سیمې یو شمېر هېوادونو او سازمانونو له افغانستان سره پر رغنده تعامل ټینګار کړی دی. تر دې وړاندې د شانګهای د همکارۍ سازمان غړو هم ویلي وو چې له طالبانو سره همکاري د سیمهییزو اقتصادي، ټرانزیټي او امنیتي اړیکو د پراختیا لپاره مهمه ده.
د راپورونو له مخې، افغانستان د مرکزي، جنوبي او لوېدیځې اسیا ترمنځ د خپل ستراتیژیک موقعیت له امله د ټرانسپورټ، سوداګرۍ او انرژۍ په دهلېزونو کې مهم رول لوبولی شي او شنونکي باور لري چې په سیمهییزو پروژو کې د دغه هېواد ګډون به د اقتصادي ودې او سیمهییزې همغږۍ لامل شي.
طالبانو بیا څو ځله ادعا کړې چې له بیا واکمنېدو وروسته یې په هېواد کې عمومي امنیت تامین کړی، د قدرت بېلابېل مرکزونه یې له منځه وړي او هڅه کوي افغانستان د اقتصادمحور سیاست او د سیمهییزې سوداګرۍ د پراختیا له لارې د سیمې د همکاریو پر باوري شریک بدل کړي.
