والسټریټ ژورنال راپور ورکړی چې د امریکا او ایران ترمنځ هغه خبرې، چې ټاکل شوې وه د روانې اوونۍ په پای کې د سویس په کوربتوب بېرته پیل شي، د هُرمز تنګي پر سر د دواړو لورو د تازه پوځي بریدونو له امله ځنډېدلې دي.
د راپور له مخې، د دواړو هېوادونو ترمنځ د تاوتریخوالي بیا زیاتېدو د ډیپلوماټیکو هڅو بهیر له خنډ سره مخ کړی او د خبرو د بیا پیل لپاره ټاکل شوې غونډه لغوه شوې ده.
سرچینو، چې د موضوع له جزییاتو خبر دي، والسټریټ ژورنال ته ویلي چې د هرمز تنګي په شاوخوا کې د وروستیو بریدونو او پوځي تحرکاتو له امله د خبرو د دوام لپاره مناسب شرایط نه دي برابر شوي.
دغه راپور داسې مهال خپرېږي چې په وروستیو ورځو کې د امریکا او ایران ترمنځ لفظي او پوځي ترینګلتیا یو ځل بیا لوړه شوې ده. دواړو لورو د هرمز تنګي په تړاو یو بل په پاروونکو اقداماتو تورن کړی او د پوځي غبرګونونو خبرداری یې ورکړی دی.
تر اوسه نه واشنګټن او نه هم تهران د یاد راپور په اړه رسمي څرګندونې کړې دي او د خبرو د بیا پیل لپاره نوې نېټه هم نه ده اعلان شوې.
