له برشونو تر تابلوګانو؛ غزني کې د هنر نوی نندارتون پرانیستل شو
د طالبانو اطلاعاتو او فرهنګ وزارت وایي، چې ددې وزارت په همکاري په غزني ښار کې د «خاموش انځور» تر عنوان لاندې درې ورځنی د نقاشۍ نندارتون د آرتلند هنري ګالري او د آریانا د نقاشۍ ښوونځي په همغږۍ پرانستل شو.
غزني کې د طالبانو د اطلاعاتو او فرهنګ رییس ویلي چې هنر او فرهنګ په اسلام کې ځانګړی ځای لري او باید اسلامي هنرونه د شریعت په چوکاټ کې پراخ شي. هغه زیاته کړې چې دغه ریاست تر دې وړاندې هم د خطاطۍ یو نندارتون د هنرمندانو په همکارۍ جوړ کړی و او هڅه کوي چې په راتلونکي کې د ولایت په کچه د نقاشۍ لوی نندارتونونه هم جوړ کړي.
نوموړي ټینګار کړی چې د اطلاعاتو او فرهنګ ریاست د اسلامي او افغاني هنرونو د ملاتړ ژمن دی او هنرمندان کولی شي د نقاشۍ له لارې د ناوړه فرهنګونو او د نشهیي توکو د زیانونو پر وړاندې د عامه پوهاوي په برخه کې رول ولوبوي.
په همدې حال کې د دغه نندارتون جوړونکو ویلي چې د دې نندارتون موخه د هنرمندانو هڅونه او په ټولنه کې د نقاشۍ هنر دودول دي. هغه زیاته کړې چې په دغه نندارتون کې شاوخوا ۵۰۰ هنري تابلوګانې نندارې ته وړاندې شوې دي، چې په جوړولو کې یې له رنګ او برش (اویل پینټ) څخه استفاده شوې ده.
د نندارتون د تنظیموونکو په وینا، دا ډول هنري نندارتونونه د نقاشۍ هنر د پېژندنې او عامو خلکو، په ځانګړي ډول د هنر مینهوالو لپاره مهم فرصتونه برابروي.
